MÁMS: Medsaqtandyrý qoryna elordalyqtar 28 mlrd teńge jarna saldy

NUR-SULTAN. QazAqparat - Júıe iske qosylǵan 2017 jyldyń 1 shildesi men 2019 jyldyń 30 qarashasy aralyǵynda Nur-Sultan qalasyndaǵy jumys berýshiler men jeke kásipkerlerden túsken medıtsınalyq saqtandyrý jarnasynyń jalpy kólemi 28 mlrd teńgeden astam somany qurady, dep habarlaıdy QazAqparat.

Bul respýblıka boıynsha aýdarym men jarnanyń jalpy somasynyń 12,3%.

«2019 jyldyń 1-30 qarashasy aralyǵynda elordalyq jumys berýshiler men jeke kásipkerler óz jumyskerleri úshin 1,124 mlrd teńgeden asa medıtsınalyq saqtandyrý jarnasyn aýdarǵan. Olardyń qomaqty bóligi - 1,121 mlrd teńgesi (99.70%) elordalyq jumys berýshilerge tıesili. Al 3 mln teńgeden astamy – jeke kásipkerler men azamattyq-quqyqtyq sıpattaǵy kelisimshartpen jumys isteıtin tulǵalardan túsken jarnalar», - deıdi «Áleýmettik medıtsınalyq saqtandyrý qory» KEAQ Nur-Sultan qalasy boıynsha fılıalynyń dırektory Nurlybek Qabdyqaparov.

Nur-Sultan qalasy jarna tóleý jaǵynan Almaty qalasynan (20,5%) keıin ekinshi orynda, al úshinshi orynda – Qaraǵandy oblysy (8,1%).

Áleýmettik medıtsınalyq saqtandyrý qoryna túsken barlyq jarna, ıaǵnı jınaqtalǵan qarjy, Ulttyq bankpen arada jasalǵan senimgerlik basqarý týraly kelisimshartqa sáıkes, Ulttyq bankte saqtalady. 2020 jyldan bastap bul qarajat Mindetti áleýmettik medıtsınalyq saqtandyrý paketi sheńberindegi qyzmetter aqysyn tóleýge jumsalady.