MÁMS: Qostanaı oblysynda 730 myń adam saqtandyrylǵan
Qostanaı oblysy ákiminiń orynbasary Marat Júndibaev Memleket basshysynyń tapsyrmalaryn oryndaý boıynsha atqarylatyn jumystarǵa toqtaldy. Atap aıtqanda ol MÁMS, QR «Pedagog mártebesi týraly» Zańyn qabyldaý, AÁK jańa formaty syndy áleýmettik saıasattyń negizgi jańashyldyqtarymen tanystyrdy.
«2019 jyldyń sońynda »Pedagog mártebesi týraly« QR Zańy qabyldanǵany málim. Nátıjesinde oblys pedagogtary úshin birqatar áleýmettik sharalar qarastyrylǵan. Jańa jyldan bastap pedagogtardyń jalaqysy 25% - ǵa ósti. Osy maqsattar úshin úsh jylǵa 84,5 mlrd teńge somasyna respýblıkalyq transfertter bólindi. Mindetti áleýmettik medıtsınalyq saqtandyrý boıynsha da kórsetkishterimiz jaqsy. Búginde Qostanaı oblysynda 730 myń adam shartty túrde saqtandyrylǵan dep esepteledi. Taǵy 405,2 myń turǵyn jarna tólemeıdi, óıtkeni olar aı saıyn memleketten qoldaý kórsetiletin azamattardyń sanatyna kiredi. Olar avtomatty túrde «saqtandyrylǵan» mártebesin alady jáne medıtsınalyq qyzmetterdiń qosymsha paketine qol jetkizedi», - dedi oblys ákiminiń orynbasary.
Marat Júndibaev kepildi kólem sheńberinde saqtandyrylmaǵan azamattarǵa da alǵashqy medıtsınalyq kómek, sozylmaly jáne áleýmettik mańyzy bar aýrýlardy emdeý qoljetimdi bolatyndyǵyna toqtaldy.
Sonymen qatar AÁK-tiń jańa tásilderi bala sanyna baılanysty (42 500-den 74 400 teńgege deıin) kópbalaly otbasylarǵa járdemaqy engizýdi kózdeıdi. Qostanaı oblysyna mundaı kómek túrin 5260 otbasy alady. AÁK eńbekke qabiletti otbasy músheleriniń jumyspen qamtýǵa járdemdesýdiń usynylǵan sharalarynan bas tartqandaryna kórsetilmeıdi. Sondaı-aq balalarǵa arnalǵan AÁK bekitilgen tólemderi joıyldy.