MÁMS: qorǵa túsken qarjy men ıgerilgen aqshanyń esebi saıtta jarııalanady

ASTANA. QazAqparat – Áleýmettik medıtsınalyq saqtandyrý qorynyń saıtynda túsken qarjy men ıgerilgen aqshanyń málimetteri jarııalanatyn bolady. Bul týraly Premer-Mınıstr Álıhan Smaıylov Májilis depýtattarynyń saýalyna bergen jaýabynda málim etti, dep habarlaıdy QazAqparat tilshisi.

«Qazirgi tańda áleýmettik medıtsınalyq saqtandyrý qory qyzmetiniń ashyqtyǵyn jaqsartý úshin ony derbestendirilgen qarjylyq esepke alý jáne aqsha qarajattarynyń qozǵalysyn qadaǵalaý qaǵıdaty negizinde tolyq tsıfrlandyrý boıynsha jumys júrgizilip jatyr. Osyǵan baılanysty qarjy qarajatynyń túsýi, olardy paıdalaný týraly aqparat qordyń saıtynda qoljetimdi bolady. MÁMS júıesin jetildirý máseleleri densaýlyq saqtaýdy tsıfrlandyrý sheńberinde josparly túrde sheshiledi», - dep jazdy Úkimet basshysy jaýabynda.

Ol keltirgen málimet boıynsha 2022 jyly áleýmettik medıtsınalyq saqtandyrý qory 20,8 mlrd teńge somasyna 3 mıllıonnan astam zańsyzdyǵyn anyqtaǵan.

«Onyń ishinde tirkeýmen baılanysty 403 mln teńgeniń zańsyzdyǵy belgili boldy. Tirkeý faktilerin alyp tastaý máselesi densaýlyq saqtaý júıesin tolyq tsıfrlandyrý jolymen sheshiledi. Bul monıtorıngpen 100% qamtýdy qamtamasyz etýge múmkindik beredi. Bul rette tsıfrlandyrý derbestendirilgen qarjylyq esep qaǵıdaty jáne medıtsınalyq qyzmetterdi tutynýshylardyń vırtýaldy shottaryndaǵy aqsha qarajatynyń qozǵalysyn qadaǵalaý negizinde júzege asyrylady», - deıdi Premer-Mınıstr.