MÁMS-ke aldyn ala salynǵan jarna medıtsınalyq qyzmet kórsetilgennen keıin ǵana aýdarylady

ASTANA. QazAqparat – Mindetti áleýmettik medıtsınalyq saqtandyrýǵa aldyn ala salynǵan jarna bankte saqtalyp, qyzmet kórsetilgennen keıin ǵana mekemege aýdarylady. Bul týraly «Áleýmettik medıtsınalyq saqtandyrý qory» KeAQ Astana qalalyq fılıalynyń dırektory Nurlybek Qabdyqaparov málim etti, dep habarlaıdy QazAqparat.

Mindetti áleýmettik medıtsınalyq saqtandyrý úshin túsken barlyq jarna aýdarymdary, ıaǵnı jınaqtalǵan qarjy, senimgerlik basqarý týraly jasalǵan kelisimshartqa sáıkes Ulttyq bankte saqtalady da, medıtsınalyq qyzmetter aqysyn tóleýge jumsalady. TMKKK jáne MÁMS paketteri boıynsha halyqqa kórsetilgen medıtsınalyq qyzmetterdiń sapasy men kólemine monıtorıng jasalyp, tekserilgennen keıin ǵana Qor jetkizýshilerine tólem júrgiziledi, -

dep túsindiredi «Áleýmettik medıtsınalyq saqtandyrý qory» KeAQ Astana qalasy boıynsha fılıalynyń dırektory Nurlybek Qabdyqaparov.

Eske salsaq, 2022 jyldyń 5 qyrkúıeginen bastap MÁMS júıesine qatysýdyń jańa tetigin qoldaný, ıaǵnı 12 aıǵa aldyn ala jarna tóleýge múmkindik bar. Buryn medıtsınalyq saqtandyrýǵa eshqashan jarna tólemegen nemese júıeli túrde tólemegen, sonyń saldarynan saqtandyrý mártebesinen aıyrylǵan derbes tóleýshiler ony qalpyna keltirý úshin ótkizip alǵan aılarǵa, tipti ótken jylǵa da jarna tóleýi qajet edi. Endi olarda balama ádis paıda boldy – jarna aýdarylmaǵan ótken kezeńdi tólemeı-aq, aldaǵy 12 aı úshin tólem jasaý arqyly «saqtandyrylǵan» mártebesin ala alady.

Biraq, 12 aıǵa birden tólem jasaýǵa bolmaıdy, óıtkeni júıe ár aı úshin tólemdi bólek oqıdy, sondyqtan ár aıǵa bólek-bólek tóleý kerek.

Jarna tóleý kezinde qatelik jiberilmegenine kóz jetkizý kerek. Áıtpese, tólem júıege túspeıdi jáne mártebe berilmeıdi. Engizilgen JSN, tólem kezeńi jáne tólem engiziletin jyldyń durystyǵyn muqııat tekserý qajet.

Eger bir aıda qate jiberilse nemese eki ret tólense, qate tólengen tólemdi «Azamattarǵa arnalǵan úkimet» memlekettik korporatsııasyna ótinish jazý arqyly qaıtarýǵa bolady.

MÁMS jarnalaryn ekinshi deńgeıdegi kez kelgen bank, bankterdiń mobıldi qosymshalary, jyldam tólem termınaldary jáne «Qazposhta» fılıaldary arqyly tóleýge bolady.

Tólemder men mártebe týraly resmı qujatty «Mindetti áleýmettik medıtsınalyq saqtandyrý júıesine medıtsınalyq kórsetiletin qyzmetti tutynýshy retinde qatysý týraly jáne aýdarymdardyń jáne (nemese) jarnalardyń aýdarylǵan somalary týraly aqparat usyný» memlekettik qyzmeti arqyly eGov.kz elektrondyq úkimet portalynan alýǵa bolady.