MÁMS: Halyqqa kórsetilgen medıtsınalyq qyzmetterdiń sany artty

ALMATY. QazAqparat – Mindetti áleýmettik medıtsınalyq saqtandyrý júıesi iske qosylǵan alǵashqy aıda elimizde halyqqa kórsetilgen konsýltatıvtik-dıagnostıkalyq qyzmet sany 2019 jyldyń qańtarymen salystyrǵanda 27% artty. Atap aıtqanda, KT jáne MRT qyzmetin tutyný kólemi 54%, ÝDZ – 21% ósken. Bul týraly búgin «Áleýmettik medıtsınalyq saqtandyrý qory» KEAQ Almaty qalalyq fılıalynyń dırektory Nurlybek Qabdyqaparov málimdedi, dep habarlaıdy QazAqparat.

Fılıal basshysynyń aıtýynsha, 2020 jyly baǵasy qymbat bolyp keletin kompıýterlik tomografııa, magnıtti-rezonanstyq tomografııa, stomatologııa syndy qyzmetterge aqy tóleý shemasy ózgerdi. Buryn qyzmet aqysy konsýltatıvtik-dıagnostıkalyq kómek kórsetetin klınıkaǵa tikeleı aýdarylatyn bolsa, bıyldan bastap emhanalar arqyly tólenedi. Ol úshin qosymsha kelisimshart bekitiledi. Buǵan deıin KT, MRT, PTsR, IFA-analız syndy zertteýler tek áleýmettik az qamtylǵan turǵyndarǵa ǵana tegin kórsetilip kelse, bıyldan bastap bul múmkindikti saqtandyrylǵan azamattar da paıdalana alady.

«2019 jyly Almaty qalasynda densaýlyq saqtaý salasyna 119,3 mlrd teńge bólindi jáne berilgen qarjy tolyq ıgerildi. Bekitilgen jospar boıynsha, 2020 jyly 182,2 mlrd teńgeniń qyzmeti satyp alynbaq. Onyń 110,7 mlrd teńgesi – tegin medıtsınalyq kómek paketine, 71,4 mlrd teńgesi – saqtandyrý paketine tıesili. ıAǵnı, jańa reforma men tarıfterdi teńestirý nátıjesinde bıyl Almaty qalasynyń densaýlyq saqtaý salasyna jumsalatyn qarajat 1,5 ese artyp otyr», - dedi Nurlybek Qabdyqaparov.

Búgingi tańda Almaty qalasy boıynsha 173 medıtsına uıymy qormen kelisimshart bekitken. Onyń 144-i tegin medıtsınalyq kómek paketi sheńberinde qyzmet kórsetedi. Memlekettik tapsyrysty oryndaıtyn emdeý uıymdarynyń 51% – jeke menshik klınıkalar.

Mindetti saqtandyrý paketi boıynsha 152 medıtsına uıymymen kelisimshart bekitilgen. Onyń 55% – jeke menshik.

«Qazir qyzmet kórsetýshi klınıkalarmen saqtandyrý paketine engen medıtsınalyq qyzmetterdi tolyqqandy kórsetý baǵytynda jumys júrip jatyr. Sebebi, bıyldan bastap qos paket sheńberinde kórsetiletin qyzmet kólemi edáýir artty. Mysaly, búgingi kúni Almaty qalasynda patsıent densaýlyǵyn qalpyna keltirý jáne ońaltýmen aınalysatyn emdeý nysandarynyń sany 62-ge jetti. Ótken jyly memlekettik tapsyrys boıynsha ońaltý qyzmetin kórsetetin emdeý uıymdarynyń sany tórteý ǵana bolatyn», - dep atap ótti Almaty qalalyq Qoǵamdyq densaýlyq basqarmasy jetekshisi Tileýhan Ábildaev.

Onyń aıtýynsha, qaladaǵy barlyq emhanalar men klınıkalar tegin medıtsınalyq kómek jáne MÁMS paketterine engen qyzmetterdi kórsetýge qajetti ınfraqurylymmen jabdyqtalǵan.

«Medıtsınalyq saqtandyrý qorymen jumys isteıtin emdeý oryndarynyń bári patsıentterge yńǵaıly bolýy úshin tólem termınaldaryn ornatyp jatyr. Mundaı apparattar saqtandyrylmaǵan azamattardyń jarnany ǵımarattan shyqpaı-aq tólep, birer sátte júıege enýine múmkindik beredi», - dep qorytty T.Ábildaev.