MÁMS engizilgennen keıin qazaqstandyqtar qandaı tegin medıtsınalyq kómek ala alady
Bul jaıynda búgin Úkimettiń selektorlyq rejimdegi otyrysynda QR Densaýlyq saqtaý mınıstri Eljan Birtanov málim etti, dep habarlaıdy QazAqparat.
Onyń aıtýynsha, MÁMS-tiń normatıvtik-quqyqtyq bazasyn qalyptastyrý maqsatynda Densaýlyq saqtaý mınıstrligi jáne basqa da memlekettik organdar normatıvtik-quqyqtyq aktiler ázirleý jáne ony qabyldaý boıynsha jumystar júrgizýde.
«Búgingi tańda 6 normatıvtik-quqyqtyq akti qabyldandy. Jyldyń sońyna 81 normatıvtik-quqyqtyq akti qabyldanady. Qazirgi ýaqytta MÁMS-tiń eń mańyzdy normatıvtik-quqyqtyq aktileri memlekettik organdarymen kelisýimen ótýde. Atap aıtqanda, tegin medıtsınalyq kómektiń kepildik beretin kóleminiń tizbesin bekitý jáne mindetti áleýmettik medıtsınalyq saqtandyrý júıesindegi medıtsınalyq qyzmetterdiń tizbesin bekitý týraly Úkimet qaýlylary», - dedi ol.
Sonymen qatar mınıstr tegin medıtsınalyq kómektiń kepildik beriletin kóleminiń toptamasy saqtandyrý mártebesine qaramastan barlyq adamdarǵa usynylatyndyǵyn atap ótti.
«Oǵan medıtsınalyq kómektiń mynadaı negizgi túrleri kiredi. Olar: jedel medıtsınalyq kómek pen sanıtarlyq avıatsııa, shuǵyl statsıonarlyq jáne statsıonardy almastyratyn kómek, áleýmettik máni bar emdeý kezinde statsıonarlyq jáne statsıonardy almastyratyn kómek (týberkýlez, onkologııa, psıhatrııa syndy áleýmettik aýrýlar), profılaktıkalyq egýler. Buǵan qosa, 2020 jylǵa deıin barlyq saqtandyrylmaǵandar úshin dári-dármekpen qamtamasyz etetin ambýlatorııalyq-emhanalyq kómek usynylatyn bolady. Bul halyqtyń áleýmettik qaýqarsyz tobynyń tolyq medıtsınalyq kómekpen qamtamasyz etilýine múmkindik beredi»,- dedi Eljan Birtanov.
Onyń aıtýynsha, saqtandyrylǵan azamattarǵa tegin medıtsınalyq kómektiń kepildik berilgen kóleminen bólek mindetti áleýmettik medıtsınalyq saqtandyrý toptamasy aıasynda qosymsha qyzmetter usynylady.