MÁMS - eń aldymen ekonomıkalyq reforma - sarapshy
Elimizdiń densaýlyq saqtaý salasyna engizilip jatqan reformanyń, MÁMS júıesiniń jumysyn, densaýlyq saqtaý júıesindegi ózgeristerdi retteıtin zań kúshine enip (2017 jyldyń 30 maýsymynda qol qoıylǵan), Áleýmettik medıtsınalyq saqtandyrý qoryna 2017 jyldyń 1 shildesinen bastap el azamattary jarnalar aýdara bastady. Jambyl oblystyq onkologııalyq dıspanseriniń bas dárigeri, Jambyl oblystyq máslıhatynyń depýtaty Abaı Nurjanov MÁMS júıesi ei aldymen ekonomıkalyq reforma dep sanaıdy.
«Men densaýlyq saqtaý salasynda 30 jyldan astam jumys jasap, Keńes úkimetinen bastap Qazaqstan Respýblıkasynyń Táýelsizdik alǵan kezeńine eıingi densaýlyq salasynda bolyp jatqan reformalarǵa qatysyp kelemin. Bastalyp otyrǵan bul júıe - óte ýaqytyly qolǵa alynyp, bolashaqta óz jemisin beretin, densaýlyq saqtaý salasynyń damýy úshin óte qajet júıe.
Bul júıe birinshiden, ekonomıkalyq reforma. Óıtkeni, medıtsınalyq saqtandyrý qoryna túsken qarajat medıtsınalyq kómektiń sapasyn jaqsartý úshin, sondaı-aq medıtsınalyq qyzmettiń naýqastarǵa qoljetimdi bolýy úshin bıýdjetti toltyrýy kerek. Zamanaýı jabdyqtar satyp alý úshin, joǵarǵy ádistemelik tehnologııalar engizý úshin, jańa ǵımarattar turǵyzý úshin bárine jetkilikti qarajat quıý qajet. Medıtsınalyq saqtandyrýdyń damýy qazirgi kezdegi densaýlyq saqtaý júıesindegi kemshilikterdi azaıtyp, júıesiz jasalyp júrgen isterdi jolǵa salady.
Ekinshiden, densaýlyq saqtaý salasynyń damýyna búkil qoǵam bolyp atsalysýymyz kerek. Sondyqtan, memleket, jumys berýshiler, jumyskerler, jeke kásipkerler óz salymdaryn qosýy qajet. Sonda ǵana kerekti qarajat jınalyp, bastaǵan isimiz júzege asady dep oılaımyn.
Úshinshiden, densaýlyq saqtaý salasynyń mamandary, dárigerler, meıirbıkeler, tehnıkalyq qyzmetkerler jalaqylary kóteriledi dep úmittenemiz. Óıtkeni, jalaqy joǵary bolǵan kezde ǵana adam bar oıyn shyn jumysqa salady.
Tórtinshiden, qoljetimdi medıtsınalyq kómek degenimiz - ár naýqastyń qalaǵan memlekettik, jekemenshik medıtsınalyq ortalyqtarda qómek alýǵa quqyǵynyń bolýy, Qazaqstan Respýblıkasynyń aýmaǵyndaǵy qalaǵan medıtsınalyq mekemege qarala alýy. Bul kómektiń bári tegin bolady», - deıdi Abaı Quralbekuly.
Tájirıbeli medıtsına salasynyń mamany reformpa sátti júzege assa syrqatqa shaldyqqan búldirshinder jan-jaqtan kómek izdep, halyqqa alaqan jaıýǵa májbúr bolmaıdy degen úmittenetinin jetkizdi.
«Medıtsınalyq mindetti saqtandyrý elimizde tamyryn jaısa, biz esh utylmaımyz degen pikirdi qoldaımyn. Túrli syrqatqa shaldyqqan búldirshinder jan-jaqtan kómek izdep, halyqqa alaqan jaıýǵa májbúr bolmaıdy degen úmittemiz. 2018 jyldyń 1 qańtarynan bastap mindetti áleýmettik medıtsınalyq saqtandyrý júıesi naqty jumysyn bastaıdy.
Medıtsınalyq qyzmetker úshin bul júıe óte jaýapty jáne aýqymdy bolyp tabylady. Densaýlyq adam ómirindegi eń zor baılyq. Biraq adamdar oǵan syrqat boıyn meńdep, mazalaı bastaǵan kezde ǵana nazar aýdarady. Endi, mindetti áleýmettik medıtsınalyq saqtandyrý júıesi boıynsha úsh jaqty jaýapkershilik, elimizdiń ár turǵyny úshin azamattyń ózi, medıtsınalyq qyzmetker, memleket jaýapty bolmaq», - dedi Abaı Quralbekuly.