MÁMS: byltyr astanalyqtarǵa 110 mlrd teńgeniń qyzmeti kórsetilgen

ASTANA. QazAqparat – Byltyr mindetti áleýmettik medıtsınalyq saqtandyrý aıasynda astanalyqtarǵa 110 mlrd teńgeniń qyzmeti kórsetilgen. Áleýmettik medıtsınalyq saqtandyrý qory Astana qalalyq fılıalynyń dırektory Nurlybek Qabdyqaparov BAQ ókilderimen ótken brıfıngide osyndaı málimet aıtty, dep habarlaıdy QazAqparat tilshisi.

«Satyp alý jospary boıynsha 2022 jyly elordada medıtsınalyq kómek kórsetýge: tegin medıtsınalyq kómektiń kepildi kólemi aıasynda – 112,1 mlrd teńge, mindetti áleýmettik medıtsınalyq saqtandyrý júıesinde – 111,6 mlrd teńge bólingen bolatyn.

Ótken jyldyń qorytyndysy boıynsha naqty oryndalǵan medıtsınalyq qyzmetter TMKKK aıasynda 111,3 mlrd teńge, al MÁMS júıesi boıynsha 110,0 mlrd teńge boldy», - dedi ol.

Sondaı-aq, Nurlybek Qabdyqaparov MÁMS aıasynda kórsetilgen qyzmetterge tólengen aqshanyń naqty qaıda jumsalǵany týraly málimet berdi.

«Shyǵynnyń basym bóligi – 48,9 mlrd teńgeden astamy statsıonarlarda kórsetilgen medıtsınalyq kómekke, 5,9 mlrd teńge – kúndizgi statsıonarda kórsetilgen qyzmetterge tólendi», - dedi fılıal dırektory.

Onyń málimeti boıynsha, byltyr Astana qalasynda MÁMS arqyly 2 282 kardıohırýrgııalyq ota jasalyp, 12 mlrd 749 mln teńge tólengen. Al, 888 neırohırýrgııalyq otanyń quny 3 mlrd 359 teńgege shyqqan. LOR salasy boıynsha jasalǵan operatsııalarǵa 681 mln teńge jumsaldy.

«Sondaı-aq, 2022 jyly Astana qalasynda travmatologter jalpy somasy 449,4 mln teńge bolatyn 240-tan astam tize, jambas býyndaryn almastyrý otalaryn jasady. Statsıonarlarda 2 612 qan-tamyr otalary jasalyp, jalpy quny 14 mlrd teńge bolǵan. Sonymen qatar, jalpy quny 496,03 mln teńge bolatyn 98 transplantatsııa jasaldy. Onyń ishinde búırek-baýyr almastyrý otalary – 91», - dedi Nurlybek Qabdyqaparov.