MÁMS boıynsha aryz-shaǵym qabyldaıtyn mobıldi qosymsha iske qosyldy
Búgingi tańda MÁMS júıesi iske qosylǵannan beri Áleýmettik medıtsınalyq saqtandyrý qorynyń biryńǵaı baılanys ortalyǵyna 1406 nómirine 40 myńnan astam qońyraý tústi.
Habarlasqandardyń basym kópshiligi - Nur-Sultan, Almaty qalalary men Qaraǵandy jáne Shyǵys Qazaqstan oblystarynyń turǵyndary.
Atap aıtqanda, onyń 3% ǵana - shaǵymdar. Qalǵany konsýltatıvtik sıpatta.
Áleýmettik medıtsınalyq saqtandyrý qory halyqpen keri baılanystyń birneshe túrin usynady. Endi patsıentter jańa «Qoldau-24/7» mobıldi qosymshasynyń kómegimen shaǵym qaldyra alady.
«Turǵyndardan túsken barlyq shaǵymdar tirkeýge alynyp, ári qaraı óńdelip, joldanymdar tizimine engiziledi. Qajet bolǵan jaǵdaıda, joldanymdar belgilengen merzimde taldaýdan ótip, sheshim qabyldaný úshin sarapshy mamandarǵa jiberiledi. Sonymen qatar patsıentter qordyń ár aımaqtyq fılıalynda uıymdastyrylǵan azamattardy qabyldaý bólmelerine júgine alady», – dep túsindirdi Áleýmettik medıtsınalyq saqtandyrý qory.
Áleýmettik medıtsınalyq saqtandyrý qory júıeli túrde turǵyndardan kelip túsken joldanymdardy muqııat qadaǵalap, apta saıyn eń mańyzdy suraqtar jınaǵy saraptamadan ótip, olar boıynsha júıeli sheshimder qabyldaıdy.