MÁMS: BQO-da 119 myńǵa jýyq adam saqtandyrylmaǵan

ORAL. QazAqparat – Batys Qazaqstan oblysynda tegin medıtsınalyq kómektiń kepildik berilgen kólemi sheńberinde qyzmet alatyn 118890 adam saqtandyrylmaǵan, dep habarlaıdy QazAqparat tilshisi.

«Áleýmettik medıtsınalyq saqtandyrý qory» KEAQ BQO boıynsha fılıalynyń dırektory Nurjamal Jumaǵulovanyń óńirlik kommýnıkatsııalar qyzmeti alańynda ótken brıfıngide málim etkenindeı, osy másele boıynsha qazirgi tańda jergilikti atqarýshy organdarmen birlesip, óńirdiń barlyq turǵyndary mindetti áleýmettik medıtsınalyq qyzmettiń tolyq paketin alýy úshin halyq arasynda túsindirý jumystary júrgizilýde.

Onyń sózine qaraǵanda, áleýmettik medıtsınalyq saqtandyrý qorynda saqtandyrylý mártebesi bolmaǵan jaǵdaıda da, azamattar tegin medıtsınalyq qyzmetterdi kepildi túrde alýy tıis jáne soǵan quqyly.

Bıylǵy indet eldiń densaýlyq saqtaý júıesi úshin úlken synaq boldy. Soǵan baılanysty josparlar aıtarlyqtaı ózgerdi. Emhanalar men aýrýhanalar qalypty rejımge jáne halyqqa josparly kómek kórsetýge endi ǵana oralýda.

«BQO boıynsha mindetti áleýmettik medıtsınalyq saqtandyrýǵa (MMS) shamamen 14,7 mlrd teńge aýdaryldy. Ekonomıkalyq belsendi emes halyq sany 355 myń bolsa, olarǵa memleket tarapynan 7,8 mlrd teńge qaraldy. 3,7 mlrd jýyq teńgeni jumys berýshiler, 2 mlrd teńgeni jaldamaly jumyskerler, 2,7 mln teńgeni jeke kásipkerler, 1,4 mln teńgeni BJT tóleýshiler, 980 myń teńgeni azamattyq-quqyqtyq sıpattaǵy shart boıynsha eńbek etetin jeke tulǵalar, 670 myń teńgeni derbes tóleýshiler jiberdi», dedi N.Jumaǵulova.

Bıyl barlyǵy 150742 adam emdeldi, bul ótken jylǵydan (176696) 25954-ke nemese 17,8 paıyzǵa kem.

Karantındik jáne provızorlyq tósekterdi qosa alǵanda, 16383 adam kovıdten emdeldi.

Ótken jyldyń 11 aıymen salystyrǵanda, josparly emdeýge jatqyzýdyń 37147-den 82186-ǵa óskeni baıqalady.