MÁMS aıasynda kómek alǵandar 63 paıyzǵa artqan - ShQO

ÓSKEMEN. QazAqparat – Shyǵys Qazaqstan oblysynda bıyl MÁMS aıasynda konsýltatsııalyq-dıagnostıkalyq kómek alǵandar sany 63 paıyzǵa artyp otyr, dep habarlaıdy QazAqparat tilshisi.

Áleýmettik-medıtsınalyq saqtandyrý qory ShQO boıynsha fılıaly baspasóz qyzmetiniń málimetine súıensek, jyl basynan beri óńir emhanalarynda konsýltatıvtik-dıagnostıkalyq kómek kórsetý kólemi 63 paıyzǵa artqan. Bul medıtsınalyq mekemelerdegi kezekti birshama qysqartýǵa jáne saqtandyrylǵan turǵyndar úshin tegin tekserýlerge jyldam joldama alýǵa múmkindik berdi.

Medıtsınalyq saqtandyrý qorynyń qarjylandyrýymen 33 myńnan astam KT, MRT qyzmetteri jáne 162 myń skrınıngtik zertteýler qarjylandyryldy. Jalpy oblys boıynsha 6,4 mlrd tenge somasyna 3,7 mln qyzmet kórsetilgen. Bul ótken jylǵy kezeńmen salystyrǵanda 1 mln-ǵa artyq.

«Álbette, jumyldyrylǵan kúsh pen qarjynyń basym bóligin koronavırýspen kúres alyp otyr. Dese de halyqqa josparly ári eń mańyzdy medıtsınalyq kómektiń kólemin ósirýdi toqtatqan joqpyz. Bul baǵytta MRT, KT sııaqty qymbat dıagnostıkalyq zertteýler, ońaltý qyzmetteri nazardan tys qalmady. Ońaltý sharalarynyń da mańyzdylyǵy zor. Ásirese koronavırýs ınfektsııasyna shaldyqqandardy ońaltýǵa kóp kóńil bólinýde», - deıdi fılıal basshysy Ǵalymjan Ábilov.

Onyń aıtýynsha, osy jyldyń 6 aıynda ońaltý sharalaryna 915 mln teńgeden astam qarjy jumsalǵan. Onyń ishinde kúndizgi statsıonarlarda - 1017 patsıentke, táýlik boıǵy statsıonarlarda - 4 684 patsıentke qyzmet kórsetildi.