MÁMS: Atyraý oblysy 17 mlrd teńge aýdardy
14:06, 02 Naýryz 2020
ATYRAÝ. QazAqparat –Atyraý oblysynda Áleýmettik medıtsınalyq saqtandyrý qoryna aýdarylǵan jarnanyń kólemi 17 mlrd 114 mln teńgeni qurady, dep habarlaıdy QazAqparat.
«Elimizde Áleýmettik medıtsınalyq saqtandyrý qoryna 2017 jylǵy shildeden beri jarna aýdarylyp keledi. Sol kezden bıylǵy 21 aqpanǵa deıin atalǵan qorǵa Atyraý oblysynan aýdarylǵan jarnanyń kólemi 17 mlrd 114 mln teńgeni qurady», - dep habarlady «Áleýmettik medıtsınalyq saqtandyrý qory» KEAQ Atyraý oblysy boıynsha fılıalynyń dırektory Sábıt Quralbek.
Onyń aıtýynsha, qorǵa túsken jarnanyń 96,8 paıyzyn, ıaǵnı 16 mlrd 584 mln teńgeni Atyraý oblysynda tirkelgen jumys berýshiler aýdaryp otyr. Al 3,2 paıyz kólemindegi 529 mln teńge jeke kásipkerlerdiń úlesine tıedi.