MÁMS arqyly qandaı medıtsınalyq kómek alýǵa bolady

ALMATY. QazAqparat – Mindetti áleýmettik medıtsınalyq saqtandyrý engizilgeli beri joǵary tehnologııalardyń kómegimen jasalatyn medıtsınalyq qyzmet kólemi artty. Osy jyldyń 9 aıynda Almaty qalasy boıynsha atalǵan qyzmet túrlerine 5,9 mlrd teńgeden astam qarajat jumsalǵan. Bul týraly MSQ Almaty qalalyq fılıaly málim etti, dep habarlaıdy QazAqparat tilshisi.

Joǵary tehnologııalyq kómek — medıtsınadaǵy kúrdeli, biregeı tehnologııalardyń kómegimen, biliktiligi joǵary mamandar tarapynan jasalatyn qyzmet túrleri.

Birinshiden, júrekke jasalatyn operatsııalar; júrek, baýyr, búırek almastyrý; mıdaǵy isikti sylyp alý; tuqym qýalaıtyn jáne júıelik aýrýlardy, leıkoz, endokrındik júıedegi aqaýlardy emdeý; asa kúrdeli hırýrgııalyq ota túrleri jatady. Qazirgi tańda qazaqstandyq dárigerler onyń 70-ke jýyq túrin jasaıdy.

Aıta keteıik, joǵary tehnologııalar arqyly jasalatyn qyzmetter saqtandyrý paketi sheńberinde kórsetiledi.

«Patsıent aýrýhanaǵa josparly túrde jatqyzylyp daıyndalady. Eń aldymen patsıent tirkelgen emhanasyna habarlasady. Dáriger ony aýrýhanaǵa jatqyzý bıýrosyna tirkeıdi. Ol úshin syrqatty qabyldaıtyn medıtsına uıymynyń konsýltatsııasy talap etiledi. Medıtsınalyq qyzmetti jergilikti deńgeıde kórsetý múmkin bolmaǵan jaǵdaıda komıssııa patsıentti respýblıkalyq klınıkalarǵa jiberý múmkindikterin qarastyrady. Qujattar tolyq ári durys rásimdelgen bolsa komıssııa eki kún ishinde sheshim shyǵarady. Oń sheshim qabyldanǵannan keıin patsıentke joldama berilip, aýrýhanaǵa jatqyzatyn kúndi belgileıdi»,– dep túsindirdi MSQ Almaty qalalyq fılıaly.

2020 jyl basynan beri Almaty qalasyndaǵy №7 klınıkalyq aýrýhana joǵary tehnologııalyq qyzmet túrlerin MÁMS paketi sheńberinde kórsete bastady. Búginde aýrýhana joǵary tehnologııalyq qyzmettiń neırohırýrgııa, qan-tamyr hırýrgııasy, travmatologııa jáne ortopedııa, ınterventsııalyq hırýrgııa, arıtmologııa syndy baǵyttar boıynsha 10 shaqty túrin kórsetedi.

Klınıka ókili Maqsat Mamyrquldyń sózine súıensek, aýrýhananyń materıaldyq-tehnıkalyq bazasy quny 1,5mln–6 mln teńgege deıin baratyn otalardy jasaýǵa múmkindik beredi. Onyń ishinde jambas jáne tize býyndaryn almastyrý, júrekke defıbrıllıator qoıý, bas súıek ishine stentter ornatý, anevrızmaǵa shaldyqqan tamyrlardy biteý syndy ota túrleri bar.

«Bizde kórsetiletin joǵary tehnologııalyq qyzmet kólemi jyl saıyn artyp keledi. Máselen, 2020 jyly bizdiń klınıkaǵa saqtandyrý paketi sheńberinde 1 mlrd teńge bólindi. Búgingi kúni 170-ten astam patsıent emdeý men dıagnostıka salasyndaǵy eń zamanaýı tehnologııalardyń ıgiligin paıdalanyp úlgerdi», — deıdi Maqsat Mamyrqul.

MSQ Almaty fılıaly basshysy Tileýhan Ábildaevtyń aıtýynsha, atalǵan qyzmetter aqysy medıtsınalyq saqtandyrý qarajaty esebinen tólenip otyr.

«Saqtandyrylǵan azamattarǵa beriletin artyqshylyq kóp. Saqtandyrý júıesinde josparly em qajet bolǵan jaǵdaıda ÝDZ, KT, MRT syndy qyzmetterden bastap, joǵarǵy tehnologııalyq kómek túrlerine deıingi aralyqtaǵy kóptegen qyzmet túrlerin paıdalanýǵa múmkindik bar», — dedi fılıal basshysy.