MÁMS: 2025 jylǵa medıtsınalyq qyzmetterdi satyp alý bastaldy

<p>TALDYQORǴAN. KAZINFORM &ndash; Áleýmettik medıtsınalyq saqtandyrý qory 2025 jylǵa arnalǵan medıtsınalyq qyzmetter kólemin ornalastyrý rásimin bastady. 27 qarashada ashylǵan portal arqyly kez kelgen aımaq ótinish bere alady.</p>

Saqtandyrý qorynyń málimetinshe, medıtsınalyq qyzmet kólemin bólýge memlekettik jáne jeke medıtsınalyq uıymdar qatysa alady. Biraq olar TMKKK jáne MÁMS júıesi aıasynda medıtsınalyq kómek kórsetý úshin densaýlyq saqtaý sýbektileriniń derekqorynda tirkelýi tıis. Sondaı-aq, qyzmetterdi satyp alý erejeleriniń 37-1-babynyń 1-tarmaǵynda kórsetilgen talaptarǵa sáıkes bolýy qajet.

- Ótinimderdi qabyldaý kezeńinen keıin komıssııa músheleri 10 kún ishinde usynylǵan qujattardyń medıtsınalyq kómek kólemderin ornalastyrý talaptaryna sáıkestigin tekseredi. Nátıjesinde densaýlyq saqtaý sýbektisiniń talaptarǵa sáıkes nemese sáıkes emestigi týraly hattama jasalady. Eger qandaı da bir eskertýler anyqtalsa, klınıkalarǵa olardy túzetý úshin 3 jumys kúni beriledi. Budan soń ótinimder qaıta qaralyp, medıtsınalyq qyzmet kólemderi komıssııa arqyly bólinedi, – dedi Áleýmettik medıtsınalyq saqtandyrý qory basqarma tóraǵasynyń orynbasary Svetlana Ponomareva.

Basqarma tóraǵasynyń orynbasary 2025 jylǵa engizilgen negizgi jańalyqtardy atap ótti. Endi medıtsınalyq qyzmet kólemderin bólý kezinde uzaq merzimdi kelisimsharttar jasalatyn sýbektilerge basymdyq beriledi. Ol úshin medıtsınalyq uıymdar:

Qor bazasynda tirkelgen bolýy;

Sońǵy 5 jyl boıy «Statsıonar jaǵdaıynda mamandandyrylǵan medıtsınalyq kómek» túri boıynsha úzdiksiz qyzmet kórsetý tájirıbesine ıe bolýy;

Densaýlyq saqtaý salasynda joǵary nemese 1-sanattaǵy akkredıtatsııa kýáligine ıe bolýy;

Bankrottyq nemese taratylý rásimderine qatyspaýy tıis.

Sonymen qatar, densaýlyq saqtaý sýbektilerin irikteý rásimine ózgerister engizildi. Bul kelesi qyzmet túrlerine qatysty:

Qan ortalyqtary – qan alý, saqtaý jáne jetkizý qyzmetteri.

Jedel járdem men sanıtarlyq avıatsııa – shuǵyl kómek kórsetý jáne naýqastardy tasymaldaý.

AITV juqtyrǵan adamdarǵa kómek – emdeý, keńes berý jáne áleýmettik qoldaý.

Týberkýlezben aýyratyndarǵa kómek – emdeý, ońaltý jáne áleýmettik qoldaý.

Psıhıkalyq aýrýlary bar adamdarǵa kómek – emdeý, psıhologııalyq qoldaý jáne ońaltý.

Qor jańa medıtsınalyq sýbektilerdi jáne jańa medıtsınalyq kómek túrleri boıynsha ótinim bergen uıymdardy sapaly irikteý úshin aımaqtyq komıssııa músheleriniń olardy tikeleı aralap tekseretinin habarlady. Bul ózgerister medıtsınalyq qyzmet sapasyn jaqsartý jáne naýqastarǵa tıimdi kómek kórsetý úshin jasalyp otyr.

Aıta keteıik 2025 jylǵa arnalǵan Medıtsınalyq qyzmetterdi satyp alý josparyna sáıkes eki paket boıynsha 2,9 trıllıon teńgeden astam qarajat qarastyrylǵan, onyń 1,3 trıllıon teńgeden astamy – MÁMS boıynsha kórsetiledi.

Eske sala keteıik, buǵan deıin Germanııadan kelgen dárigerdiń taldyqorǵandyq naýqasqa tegin ota jasaǵany týraly jazǵanbyz.