Mamın Tikeleı ınvestıtsııalar qory kompanııasynyń dırektorlar keńesin basqarady
«AHQO óz kezeginde Tikeleı ınvestıtsııalar qory týraly kelesi jaıtty aıtqysy keledi. Qarjy mınıstrliginiń tapsyrmasy boıynsha, biz qor men basqarýshy kompanııany tirkedik. Kompanııany basqaratyn dırektorlar keńesin Úkimet basqarady. Onda Premer-mınıstr bolady. Dırektorlar keńesiniń músheleri osy qurammen saılanyp, tıisti basqarýshylardy taǵaıyndaıdy», - dedi Qaırat Aıtekenov Májilistegi Qazaqstannyń 2019-2023 jyldarǵa arnalǵan áleýmettik-ekonomıkalyq damý boljamyn naqtylaýǵa arnalǵan otyrysynda.
Óz kezeginde Qarjy vıtse-mınıstri Tatıana Saveleva Tikeleı ınvestıtsııalar qoryn, ıaǵnı «Qazaqstandyq ınvestıtsııalyq qordy» qurý úshin Ulttyq bankten maqsatty transfertti bólý esebinen 370 mlrd teńge qarastyrylǵanyn atap ótti.
Onyń aıtýyna qaraǵanda, qor shıkizattyq emes sektorda ozyq jobalardy júzege asyrý úshin qurylady. Qazaqstannyń ekonomıkasyna tikeleı sheteldik ınvestıtsııany óńdeý ónerkásibi, agroónerkásiptik keshen, ınnovatsııalyq sektor, ınfraqurylymdy damytý boıynsha tartý josparlanǵan.
Eske sala ketsek, ótken jyldyń qazan aıyndaǵy Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halyqqa Joldaýynda «Іri ári serpindi jobalardy júzege asyrý úshin sheteldik ınvestorlarmen birlesip ınvestıtsııa salý qaǵıdaty boıynsha jumys isteıtin Shıkizattyq emes sektorǵa bólinetin tikeleı ınvestıtsııa qoryn qurý máselesin qarastyrý qajet», delingen bolatyn.