Mamın Shymkentte «Nurly jer» aıasynda salynyp jatqan turǵyn úılerdiń qurylysymen tanysty

ShYMKENT. QazAqparat - Búgin Ońtústik Qazaqstanǵa jasaǵan jumys sapary barysynda QR Premer-Mınıstriniń Birinshi orynbasary Asqar Mamın Shymkent qalasyndaǵy «Nurly jer» baǵdarlamasy aıasynda salynyp jatqan kópqabatty turǵyn úılerdiń qurylys jumysymen tanysty, dep habarlaıdy QazAqparat tilshisi.

Óńirde atalǵan baǵdarlama aıasynda qurylysy júrgizilip jatqan jumystardyń barysyn baıandaǵan oblys ákiminiń birinshi orynbasary Darhan Satybaldy kredıttik turǵyn úı satyp alýǵa múmkindigi joq 35 myń otbasyny arendalyq baspanamen qamtý úshin oblys kóleminde 1 mıllıon 700 myń sharshy metrden astam turǵyn úı qoryn qurý qajettigin atap ótti.

Aıta keteıik, jalpy oblysta «Nurly jer» baǵdarlamasy aıasynda kópqabatty 364 turǵyn úı salynýda. Onyń ishinde ıpotekalyq nesıelendirýdiń qoljetimdiligin arttyrý maqsatynda 96 turǵyn úı, al jeke qurylys salýshylar esebinen 107 turǵyn úıdiń qurylysy júrgizilse, turǵyn úı qurylys jınaqtar júıesi arqyly 73 nesıelik turǵyn úı salynýda. Budan bólek, jalǵa beriletin turǵyn úı qory arqyly 88 jeke turǵyn úıdiń qurylysy qolǵa alynatyn bolady.

 

Al, ótken jyly 128,3 myń sharshy metr turǵyn úı paıdalanýǵa berilip, 2113 otbasy jeke turǵyn úımen qamtamasyz etildi. Aǵymdaǵy jyldyń basynan bastap turǵyn úı qurylysyna 41,1 mlrd teńge kóleminde ınvestıtsııa jumsalsa, qazirgi ýaqytta 461,5 myń sharshy metr paıdalanýǵa berildi.

Jalpy «Nurly jer» baǵdarlamasy aıasynda salynatyn turǵyn úı qurylysyna 21,8 mlrd teńge kóleminde memlekettik ınvestıtsııa bólý josparlansa, jyl sońyna deıin 61,1 myń sharshy metr bolatyn 1126 páterdi quraıtyn turǵyn úı paıdalanýǵa beriledi.