Mamın Airbus basshylyǵymen birlesken jobalardy iske asyrý máselesin talqylady

NUR-SULTAN. QazAqparat – QR Premer-Mınıstri Asqar Mamın Airbus kontserniniń vıtse-prezıdenti Alberto Gýterrespen kezdesý ótkizdi. Taraptar Qazaqstanda kontsern shyǵaratyn áskerı jáne azamattyq áýe kemelerine qyzmet kórsetetin jáne jóndeıtin sertıfıkattalǵan ortalyq qurý jobasyn iske asyrý máselesin talqylady, dep habarlaıdy primeminister.kz.

Kelissózder barysynda «Ǵalam BK» JShS birlesken kásipornynyń ónimin Airbus óndiristik tizbegine qosý, sondaı-aq kontsern ushaqtaryn óndirý úshin qazaqstandyq shıkizatty jetkizý kólemin ulǵaıtý perspektıvalaryna erekshe nazar aýdaryldy. Qazirgi tańda Qazaqstan Airbus-pen birlesip «Evrokopter Qazaqstan ınjınırıng» JShS, «Qazaqstandyq avıatsııalyq ındýstrııa» JShS jáne «Ǵalam BK» JShS bazasynda birlesken jobalardy iske asyryp jatyr.

2021 jylǵy 1 qyrkúıekte Qazaqstan Qorǵanys mınıstrliginiń qajettilikteri úshin júk kótergishtigi joǵary eki Airbus A400M áskerı-kólik ushaǵyn satyp alýǵa kelisimshartqa qol qoıyldy. Ushaq áskerı, azamattyq gýmanıtarlyq mıssııalar aıasynda áýe tasymalyn júzege asyra alady, tótenshe jaǵdaılarda jedel is-qımyl jasaýda tıimdi. Airbus A400M jetkizý kelisimsharty qyzmetkerlerdi oqytý jáne tehnıkalyq qoldaýdy uıymdastyrý boıynsha qyzmetter paketin qamtıdy.

Alǵashqy áýe kemesin 2024 jyly jetkizý kózdelgen. Kezdesýge ındýstrııa jáne ınfraqurylymdyq damý mınıstri Beıbit Atamqulov, qorǵanys mınıstri Murat Bektanov jáne t. b. qatysty.