Mámilelerdiń jaramsyzdyǵy ınstıtýty jetildiriledi - Ádilet mınıstrligi

ASTANA. QazAqparat - Qazaqstanda Mámilelerdiń jaramsyzdyǵy ınstıýty jetildiriledi. Bul týraly búgin Parlament Májilisinde «Qazaqstan Respýblıkasynyń keıbir zańnamalyq aktilerine azamattyq zańnamany jetildirý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.

Ádilet mınıstriniń orynbasary Záýresh Baımoldınanyń aıtýynsha, qoldanystaǵy Azamattyq kodekste mámilelerdi mánissiz jáne daýlanatyn dep bólý qarastyrylǵan.

«Alaıda, bundaı normalardy bóletin ortaq normalar joq, osyny  zańnamalyq deńgeıde bekitý kózdeledi. Bundaı jaǵdaı sot praktıkasyn kúrdelendirip otyr. Aıta keterligi, zań júzinde osy norma qalys qalǵandyqtan, ondaı olqylyq kelisimsharttardyń turaqsyzdyǵyn týdyrady. Sonymen qatar, Qazaqstannyń jaǵymdy ınvestıtsııalyq klımatyna da tóndirer qateri bar», dedi Z. Baımoldına.

Onyń aıtýynsha, TMD elderiniń osy baǵyttaǵy tájirıbelerin eskere kele, aıqyn quqyq buzýshylyqty boldyrmaý maqsatynda kelisimsharttardy mánissiz jáne daýlanatyn dep bólý usynylǵan.

«Bul rette daýlanatyn mámileler sottyń mámileni jaramsyz dep tanýy týraly sheshimi zańdy kúshine enbeıinshe jaramsyz dep eseptele beredi. Al mánissiz mámile ulttyq zańnamalyq aktilerde tikeleı kózdelgen jaǵdaılarda jaramsyz dep sanalady», dedi Z. Baımoldına.