Mámı Qytaıda ótken halyqaralyq forýmǵa qatysty

ASTANA. QazAqparat - Qytaı Halyq Respýblıkasynyń Joǵarǵy Halyq sotynyń tóraǵasy Chjoý Tsıan myrzanyń shaqyrtýymen Qaırat Mámı Jibek jolyndaǵy sot yntymaqtastyǵy boıynsha halyqaralyq forým jumysyna qatysý úshin Qytaıdyń Dýnhýan qalasyna (Gansý provıntsııasy) keldi, dep habarlaıdy QR Joǵarǵy sotynyń baspasóz qyzmeti.

Forým jumysyna Sýdan, Venesýela, Ázerbaıjan, Tájikstan joǵarǵy sottarynyń tóraǵalary, sondaı-aq 15 shaqty eldiń sot tóraǵalary men sýdıalary qatysýda.

Forým shekaralyq daýlardy neǵurlym tıimdi sheshý, transulttyq qylmyspen kúresý, turaqty, ádil, ashyq ári boljaldy quqyqtyq ortany qurý úshin Qytaı men Uly Jibek Joly elderi arasyndaǵy tájirıbe almasý men yntymaqtastyqty keńeıtý maqsatynda ótkizilýde. Forýmnyń kún tártibine halyqaralyq sot kómegin nyǵaıtý, kommertsııalyq zańdardy úılestirý jáne t.b. birqatar máseleler engen. 

Q.Mámı óziniń kirispe sózinde forýmdy quqyq ústemdigi men sot júıesi jumysynyń ózekti máseleleri boıynsha kásibı pikir almasýdyń tamasha múmkindigi dep atady. «Forým ózindik qaıtalanbas paradıgma - Jibek Joly obrazyna ıe. Qazaqstan Prezıdenti Nursultan Ábishuly Nazarbaev Jibek Jolyn jańǵyrtý jobasyn «halyqaralyq baılanystardy yntalandyrýdyń jańa draıveri» dep ataǵan bolatyn. Bul pikirge basqasha oı bildirýdiń ózi artyq», - dedi Qazaqstan Joǵarǵy sotynyń tóraǵasy.

«Zań ústemdigi mádenıeti jáne sot reformasy» sessııasynda jasaǵan negizgi baıandamasynda Mámı Ult Jospary sheńberinde júrgizilgen sot reformalary týraly aıtty. Aqparat sottardy ınstıtýtsıonaldyq kúsheıtý, sottardyń kadr saıasatyn reformalaý, «elektrondy sot tóreligin» damytý, azamattyq protsestik zańdy jaqsartý jáne qylmystyq zańnamany jańǵyrtý  sekildi bes basym baǵyt boıynsha júıelenip usynyldy.
 

Birinshi basymdyq sheńberinde qatysýshylar úsh satyly sot júıesine kóshý, respýblıkanyń Joǵarǵy soty janynan ınvestıtsııalyq daýlardy qaraıtyn mamandandyrylǵan sot alqasynyń, aıryqsha soty bar Astana Halyqaralyq qarjy ortalyǵynyń (AIFC) qurylǵany týraly habardar boldy. 

Forým qatysýshylary sot bilimin berý reformalarymen, Qazaqstannyń Azamattyq protsestik kodeksti jańǵyrtýdaǵy oń tájirıbesimen jáne qylmystyq protsestik zańnama boıynsha aldaǵy ýaqytta júrgiziletin reformanyń mán-jaıymen tanysty.

«Elektrondy sot tóreligin» damytý týraly aıta kele, Q.Mámı Qazaqstannyń Joǵarǵy sotynda Qytaı men Ońtústik Koreıanyń tájirıbesi negizinde jergilikti sottardyń jumysyn 700 kórsetkish boıynsha onlaın rejımde baqylaıtyn Ahýaldyq ortalyqtyń iske qosylǵanyn málimdedi.

Forým sheńberinde Joǵarǵy sot Tóraǵasy «Faxin online» elektrondy servısiniń halyqaralyq nusqasynyń iske qosylý saltanatyna da qatysty. Bul jańa júıe memleketaralyq deńgeıde sot aqparatymen almasýdy jaqsartýǵa baǵdarlanǵan.