Mamandar «qara jáshik» jazbalaryn zerdeleý barysynda «Skat» kompanııasynyń Challenger-200 ushaǵy quraldarynyń isten shyǵý deregin ázirshe anyqtaǵan joq - A.Daýylbaev

ASTANA. 25 aqpan. QazAqparat - Mamandar «qara jáshik» jazbalaryn zerdeleý barysynda «Skat» kompanııasynyń Challenger-200 ushaǵy quraldarynyń isten shyǵý deregin ázirshe anyqtaǵan joq.

Bul týraly búgin KTK telearnasyndaǵy Artýr Platonovtyń «Halyq qyzmetshisi» baǵdarlamasynda suhbat bergen QR Bas prokýrory Ashat Daýylbaev aıtty.

«Qazirgi ýaqytta biz «Chellendjer» bortyndaǵy barlyq jazbalardy taýyp, rasshıfrovka jasaı aldyq. Halyqaralyq avıatsııa komıteti pen ushaqty jasaǵan zaýyt bul apparatýralardy barynsha tyńǵylyqty zertteý ústinde. Degenmen, biz ózimizdiń tergeý amaldarymyzdy qatar júrgizýdemiz. Bizdiń tergeýshiler men mamandar jazba málimetterdi saraptaýda jáne qazirgi ýaqytta biz bul ushaq quraldarynyń isten shyǵýyn kýálandyratyn birde-bir kórsetkishti kórip otyrǵan joqpyz. Biraq ta rasshıfrovka jasaý odan ári jalǵasýda. Muny avıatehnıkany búge-shigesine deıin biletin mamandar jasaýy tıis», dedi A.Daýylbaev.