Mamandar ınternettegi qarjy alaıaqtarynan qorǵanýdyń tásilderin aıtty
Birinshiden, kıber-gıgıenany saqtaý baǵytynda tólemderdi rastaý úshin paıdalanylatyn parolderdi, kodtardy nemese qupııa derekterdi eshqashan eshkimge habarlamańyz. Qaýipsizdiktiń zamanaýı júıeleri basqa adamdarǵa parolder men kodtar berilmeıtindeı etip jasalady.
Ekinshiden, URL-adresti tekserińiz. Ásirese, tanys emes jóneltýshilerden alynǵan siltemelerdi tekserip qarańyz. Qaskúnemder jazylýy boıynsha uqsas domenderdi jıi paıdalanady.
Úshinshiden, qupııa aqparat engizýdi talap etetin, ıaǵnı paroldi engizý talap etiletin saıttarda HTTPS: // prefıksiniń bolýyn tekserińiz.
Tórtinshiden, zamanaýı braýzerlerdiń kópshiliginde fıshıngtiń jappaı shabýylyna qarsy turýdyń endirilgen tetikteri bar. Qaýipter týraly braýzerdiń habarlamalaryna nazar aýdarý kerek.
Besinshiden, eger uıymdardyń saıty nemese paraqshasy kúmán týdyrsa, sol uıymmen baılanysyńyz jáne óz bankińizdiń ınternet-bankıng júıesinde tólem jasaǵyńyz kelse, aqparatty naqtylap alyńyz.
«Bul turǵyda bankke qońyraý shalyp, aqparatty naqtylap alǵan jón. Esińizde bolsyn, bank menedjerleri aldymen klıentke qońyraý shalmaıdy. Sondyqtan sizge qońyraý shalyp, sizdiń shotyńyzdaǵy túsiniksiz tranzaktsııalardy buǵattaý úshin SMS arqyly kelip túsken kodty surasa, telefonmen sóılesýdi doǵaryp, sizge qyzmet kórsetetin bankke habarlasyńyz», - deıdi mamandar.
Alynshydan, eger siz kúmándi saıtta tirkelgen bolsańyz, onda jeke derekterińizdi qorǵaý úshin elektrondyq poshtańyzdy ózgertý kerek.
Budan buryn habarlanǵandaı, QR Qarjy naryǵyn retteý jáne damytý agenttigi koronavırýs taqyrybyn jeleý etken alaıaqtardyń jumysy jandanǵanyn málim etti.