Mamandar elimizde taǵamǵa qosylatyn tuzdyń mólsherin azaıtýǵa keńes berdi

ASTANA. QazAqparat – Qazaqstanda azyq-túlik ónimderinde tuzdyń mólsheri tym kóp kezdesedi. Onyń saldarynan sozylmaly aýrýlar asqynyp otyr. Bul týraly Senat depýtaty Aqmaral Álnazarova aıtty, dep habarlaıdy QazAqparat tilshisi.

Onyń aıtýynsha, Qazaqstanda taǵamdarǵa tuz tym kóp mólsherde qosylady. ıAǵnı Dúnıejúzilik densaýlyq saqtaý uıymy usynǵan qaýipsiz deńgeıden 4 ese joǵary bolyp tur.

«Osynyń saldarynan arterııalyq gıpertenzııa men júrek-qan tamyry aýrýlarynyń, II tıpti qant dıabetiniń jáne onkologııalyq aýrýlardyń keıbir túrleriniń órshýine qatysty negizgi qaýip faktorlarynyń biri bolyp otyr», - dedi A. Álnazarova Senattaǵy Úkimet saǵatynda densaýlyq saqtaý máselesin talqylaý kezinde.

Dúnıejúzilik densaýlyq saqtaý uıymynyń tuzdy taǵamǵa qosý deńgeıin azaıtýǵa qatysty belgilegen nusqaýyna sáıkes, 2025 jylǵa qaraı tuzdy paıdalanýdy 30%-ǵa azaıtý qajet.

Budan buryn habarlanǵandaı, Qazaqstanda nan jáne toqash ónimderindegi tuzdyń mólsheri tómendetilmek.