Mamandar Býrabaı taýlarynda túnde júrmeýge keńes berdi

KÓKShETAÝ. QazAqparat - Sınıýha (Kókshetaý) taýyndaǵy oqıǵadan keıin Aqmola oblysynyń týrıstik aqparat ortlyǵy men óńirdegi týroperatorlar demalýshylardy taýǵa shyqqanda abaı bolýǵa shaqyrdy, dep habarlaıdy QazAqparat tilshisi.

«Sizderden taýda qaýipsizdik erejelerin saqtaýlaryńyzdy suraımyz. Daıyndalǵan gıdpen toppen birge júrińizder... Óz betterińizben taýǵa kóterilmeńizder, bul ómirlerińiz úshin asa qaýipti!», - dedi Aqmola oblystyq týrıstik aqparat ortalyǵynyń qyzmetkeri.

«Býrabaı Damý» JShS da týrısterge óz ómirlerine qaýip tóndirmeýge shaqyrdy. Taýda kún kúrkireýi, tuman men túnde taý arasynda júrý adamdarǵa qaýipti ekendigin aıtty.

«Taýdaǵy naızaǵaı - eń úlken qaýip, sebebi adam bıiktikte bolǵanda, naızaǵaı razrıadyna tap bolýy múmkin. Jaı túskende jáne kún kúrkiregende aýa terbelip, tas qulaýy múmkin. Naızaǵaıdyń kele jatqanyn aýa ıondalýynan bilýge bolady. Ondaı kezde adamdardyń shashtary turyp, taraǵan kezde titirkenýi múmkin. Metall zattarǵa adamnyń denesi tıgende elektr razrıady bolady», - dedi «Býrabaı Damý» JShS-da.

Atalyp ótilgendeı, tuman kórý múmkinshiligin nasharlatyp, joldan adastyrýy múmkin. Mamandar túnde taýda júrmeýge keńes berýde.

«Kóptegen adamdar Býrabaı kýrorttyq aımaǵynda taýdyń bıiktigi mańyzdy emes dep esepteıdi. Osylaısha, taýda júrý erejeleri men tehnıka qaýipsizdigin elemeıdi. Bul qaıǵyly jaǵdaıǵa ákep soqtyrýy múmkin. Sondyqtan, óz betterińizben taýǵa shyqpaýdy suraımyz», - dep túıindedi vedomstvodan.

Eske salaıyq, 2018 jyldyń 25 shildesinde 24 jastaǵy Astana turǵyny selfı jasaımyn dep, taýdan qulap ketken edi. Dárigerlerdiń aıtýynsha, naýqastyń jaǵdaıy aýyr.