Mamandar bıtým tapshylyǵyn sheshý joldaryn qarastyrdy
Jıyn barysynda ákimdikter men «QazAvtoJol» UK ókilderi aldaǵy ýaqytta bıtým tapshylyǵy men jol-qurylysy jumystarynyń toqtaýy taǵy da qaıtalanýy múmkin ekendigin jetkizdi. Buǵan basty sebep – merdigerlerdiń bıtýmdy saqtaıtyn jeri joq bolǵandyqtan, aldyn ala satyp ala almaıdy. Sondyqtan olar daıyn asfalt satyp alýǵa májbúr.
«Jol qurylysy salasyndaǵy merdigerler mezgildiń jyly kezinde bıtýmdy jappaı satyp alady. Al qalǵan kezeńde bıtým óndirýshiler ónimge degen tómen suranystyń áserinen shyǵynǵa tap bolady. Alaıda, olar muny ónim suranysqa ıe maýsymda onyń baǵasyn ósirip óteıdi. «QazAvtoJol» kompanııasy men ákimdikter Energetıka mınıstrligimen birlesip aı saıyn bıtýmdy bólý boıynsha bólýdi júzege asyrady. Biraq oǵan negizgi suranys jazda keledi», – dep atap ótti jıyn qatysýshylary.
Basqosý barysynda máseleni ońtaıly sheshý jolyn Qazaqstan jolshylar qaýymdastyǵynyń prezıdenti usyndy.
«Shuńqyrlar - bıtýmdy saqtaıtyn eń qoljetimdi oryn. Biraq bul shuńqyrlarda bıtým qatyp qalady, ony únemi jylytyp otyrý qajet. Al budan onyń sapasy tómendeıdi. Demek joldardyń sapasyna da tikeleı áser etedi. Shıkizatty angar qoımalarynda saqtaýǵa da bolady. Óıtkeni, árbir merdigerdiń osyndaı qoımasy bar. Sodan keıin qysta da, jazda da bıtým satyp alýǵa bolady», – dedi Baǵlan Baımaǵambetov.
Óz kezeginde Energetıka mınıstrligi munaıdy tasymaldaý jáne óńdeý departamenti dırektorynyń orynbasary Samat Mergenov vedomstvolyq bırjalarda satylatyn bıtýmnyń úlesin arttyrýdy usyndy. Onyń aıtýynsha, bul taraptaǵy kórsetkish 2021 jyldan beri ózgergen joq.
Aıta keteıik, Memleket basshysy Qasym-Jomart Toqaev bıylǵy Joldaýynda elimizde áli kúnge deıin bıtým tapshy ekendigine nazar aýdaryp, iri kólemde munaı óndiretin el úshin bul uıat jaǵdaı ekendigin aıtqan bolatyn. Osyǵan oraı Prezıdent Úkimetke bul máseleni tikeleı baqylaýǵa alýdy tapsyrdy.
Foto: facebook.com/industry.gov