Mamandandyrylǵan HQKO-lar júrgizýshi kýálikterin zańsyz berip kelgen

NUR-SULTAN. QazAqparat – Qostanaı jáne Aqmola oblystarynda Mamandandyrylǵan halyqqa qyzmet kórsetý ortalyqtarynyń qyzmetkerleri jol qozǵalysy erejeleriniń teorııalyq emtıhandaryn burmalap ótkizip kelgen. Bul týraly QR Sybaılas jemqorlyqqa qarsy is-qımyl agentiginiń baspasóz qyzmetinen málim etti, dep habarlaıdy QazAqparat tilshisi.

«Júrgizýshi kýáliginen úmitti azamattardyń ornyna emtıhandy arnaıy daıyndalǵan tulǵalar tapsyryp otyrǵan. Mysaly, Aqmola oblysynda arnaıy daıyndalǵan adamdar emtıhan kompıýterlerine qashyqtan qol jetkizip, bógde azamttardyń ornyna durys jaýabyn belgilep otyrǵan.

Al Qostanaı oblysynda arnaıy daıyndalǵan adamdar medıtsınalyq maska men bas kıimniń kómegimen bet álpetin tumshalaý arqyly ózge azamattardyń ornyna kirip kelgen. Tergeý barysynda 1 myńnan astam júrgizýshi kýáligin zańsyz berý faktileri tekserilip, emtıhannan sátti ótkeni týraly berilgen jalǵan anyqtamalar qaıtaryldy», - dep jazady agenttiktiń baspasóz qyzmeti.

Agenttik ókilderiniń aıtýynsha, osyndaı jalǵan qujat arqyly júrgizýshi kýáligin alǵan qostanaılyq azamat naýryz aıynda jol erejesin óreskel buzyp, «Toyota Samrý» avtokóligimen soqtyǵysqan.

«Tergeý málimeti boıynsha, apatqa kináli turǵyn teorııalyq jáne praktıkalyq emtıhan tapsyrmaı-aq júrgizýshi kýáligin alǵan.

Al bul joly anyqtalǵan zańsyzdyqtarǵa baılanysty eldegi mamandandyrylǵan HQKO-nyń bárinde tekserý júrgiziledi», - delingen resmı málimette.