Maman daıarlaýda san emes sapaǵa qaraıtyn ýaqyt keldi - QazMQPÝ rektory

ALMATY. Qazaqparat -  Elbasy Joldaýy jetistikke jetý jolyn tabý úshin nendeı jumystar istelýi qajettigin aıqyndaý jolyndaǵy - mańyzdy qadam. Osyndaı pikirimen Qazaq memlekettik qyzdar pedagogıkalyq ýnıversıtetiniń rektory, pedagogıka ǵylymdarynyń doktory, professor Gaýhar Aldambergenova bólisti.

Onyń aıtýynsha, Memleket basshysy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty bıylǵy Joldaýynda jarııalanǵan basymdyqtar men mindetter Qazaqstannyń áleýmettik-ekonomıkalyq jáne tehnologııalyq turǵyda jańǵyrtýdyń logıkalyq jalǵasy ispettes. 

«Elbasy mańyzdy qujattyń «Turmys sapasyn arttyrý» atty ekinshi basymdyǵynda joǵary bilim berýge qatysty, pedagog mártebesi jaıynda birqatar mańyzdy mindetterdi atap ótti. Atap aıtqanda, 2019 jyly «Pedagogtardyń mártebesi» týraly zań qabyldanady. Bul - qazaqstandyq ustazdar qaýymynyń qoǵamdaǵy bedelin arttyryp, ornyn aıshyqtaýǵa zor qadam bolmaq»,  - dedi ýnıversıtet rektory. 

Gaýhar Aldambergenova Memleket basshysynyń oqý oryndaryna qoıyp otyrǵan talap údesinen shyǵý kerektigin aıtty.

«Memleket basshysy naryqta tek sapaly bilim bere alatyn joǵary oqý oryndary qalý kerektigin basa aıtty. Rasynda da bilikti kadr daıyndaýda jáne ǵylymı jumystar júıesinde ýnıversıtetter mańyzdy ról atqarady. Osyǵan oraı otandyq JOO oqytýshylardyń qaıta daıarlyqtan ótýine basty nazar aýdaryp, álemdik jetekshi ýnıversıtetterdiń synnan ótken tájirıbesin paıdalanýy tıis dep oılaımyn. Bul - qazaqstandyq joǵary bilim berý júıesin zaman aǵymyna sáıkestendirýge negiz bolady»,  - dedi ol. 

Gaýhar Aldambergenovanyń aıtýynsha, Joldaýda maman daıarlaý sapasyn arttyra túsýge aıryqsha kóńil bólingen. 

«Qazir az da bolsa sapaly maman daıarlaıtyn ýaqyt keldi. Bul baıaǵy bir kezderdegideı oqý oryndarynyń topyrlatyp túlek shyǵaratyn úrdisiniń kúni ótip bara jatqanyn baıqatady. Munyń bári jańasha oılaýǵa jatady. Al jańasha oılaý - qoǵam sanasynyń jańǵyrýyna basty tetik. Joldaýdyń bilimge qatysty qurmet kórsetýdi úndeıtin tarmaǵynan týǵan oılar bizdi osyndaı tujyrymdarǵa jeteleıdi. Túptep kelgende, sapaly bilim - bizdiń joǵary oqý oryndary men mamandardyń básekege qabilettigin arttyryp, olardyń osy saladaǵy is-áreketterine tarazy bolady. Bul turǵyda Qazaq memlekettik qyzdar pedagogıkalyq ýnıversıteti bilim men ǵylymdy damytýdy, qyzdarǵa pedagogıkalyq bilim berýdi jáne belsendi azamattyq ustanymdy basty maqsat etip kele jatqan oqý orny ekendigin aıtqym keledi. Ýnıversıtet ujymy Joldaýda kórsetilgen mindetterdi saralap, tyń oılary men ıdeıalaryn júzege asyrýǵa nıetti. Bul tarapta arnaıy keshendi jospar qabyldanady»,  - dedi rektor. 

Eske sala ketsek, Elbasy Joldaýynda 2019 jyly Qazaqstanda «Pedagogtardyń mártebesi» týraly zań qabyldanýy kerektigi aıtylǵan bolatyn.