Mamamdy qatty saǵynyp júrmin - Dımash Qudaıbergen
Dımash Qudaıbergen týǵan jeri Aqtóbege osy jyldyń qańtar aıynda kelip, bir apta demaldy. Buǵan deıin habarlaǵanymyzdaı, Aqtóbege kelgen kezde ustazdaryna bardy, bilim alǵan Ahmet Jubanov atyndaǵy mýzykalyq kolledjde boldy. Al búgin ol anasyn saǵynǵanyn aıtyp, jyly lebizin bildirgen.
«Mamamdy qatty saǵynyp júrmin. Aqtóbede kún jyly sııaqty, mamam - baqshasynda. «Ananyń oıy uıada, balanyń oıy qııada» dep halyq qalyp aıtpaǵan dep bilemin. ...Bala kezde dostarymmen birge oınap kelýge suraný úshin aýlada ósip turǵan kókónister men jemisterge sý quıyp, resmı turǵyda úıdegi «boss» papamyzǵa, sonan soń mamamyzǵa kórsetip baryp ketetinbiz... Mamam úıdiń qasynda dostarymmen fýtbol oınap júrgen meni «sabaǵyńa daıyndal» dep shaqyratyn. Halyq danalyǵy - «Ananyń alaqany balaǵa aıdyndy qonys». Kezinde mamamyz sabaq berip, qyzmet jasaǵan kezde óńirdegi tanymal, izdenimpaz muǵalimderdiń biri bolǵan. «Ýchıtel metodıst» degen birneshe belgileri de bar. Mansaby órlep turǵan shaǵynda men dúnıege keldim. Sol kezde aǵataıym men Sveta apamnyń, meniń bolashaǵym úshin otbasymyzben Embi eldi mekeninen Aqtóbe qalasyna kóship, 47 jasynda barlyq jumysyn meni baǵý úshin tastaǵan bolatyn. Bes jasymnan mýzyka mektebine apardy. Mamamnyń bizge sińirgen eńbekteri týraly jazatyn bolsam, post emes, kitap jazý kerek bolatyn shyǵar. Men úshin əlemdegi eń dana, eń sulý, eń dara adam - ol meniń anam. Merekeńizben, janym mama...»,- dep jazdy Dımash Qudaıbergen Instagram paraqshasynda.
Aıta keteıik, ánshi taıaýda ǵana Kann festıvaline qatysyp, qyzyl kilemmen júrip ótti. Qazaqstan pavlonynyń ashylýyna qatysyp, óner kórsetti. Eske salsaq, Dımash Qudaıbergen maýsymda týǵan jeri Aqtóbege keledi. Ol «Baqytty bala» festıvaliniń gala kontsertinde án shyrqaıdy.