«Malymyzdy atyp tastaıdy»: Qaraǵandylyqtar ferma ıesiniń ústinen aryzdandy

QARAǴANDY. QazAqparat – Qaraǵandy oblysy, Buqar jyraý aýdanyna qarasty Tuzdy aýylynyń turǵyndary egis alqabyna kirip ketken maldy shetinen atyp jatqan fermerdiń ústinen polıtsııaǵa aryz jazdy, dep habarlaıdy QazAqparat tilshisi.

Tuzdy aýylynyń turǵyndarynyń basym bóligi bankterden nesıe alyp, ol qarajatqa mal satyp alyp kún kórip otyr. Solardyń biri Myrzabek Jabaı jylqy men sıyr ósirý úshin bankten 3 mıllıon teńge kredıt alǵan. Jýyrda egin alqabyna tuıaǵy tıgen bıesin belgisiz bireýler atyp tastaǵan.

«Jylqymdy keshkilik saǵat 19.30 shamasynda qaıyryp ketkenmin. Jarty saǵattyń aralyǵynda osynda oralsam, bıemdi bireý atyp tastapty. Ólgen malymnyń janynda oqtar jatyr. Osy jerde baılap, saýyp otyrǵan bıem. Ary qaraı da malymyzdy osylaı qyra berse, biz qalaı ómir súremiz, qalaı kún kóremiz?!», - dep nalyp otyr Tuzdy aýylynyń turǵyny Myrzabek Jabaı.

Jergilikti halyqtyń aıtýynsha, aýyldaǵy sharýa qojalyǵynyń ıesi egistik alqabyna kirip ketken maldy ol emes, ańshylar atýy múmkin dep jaýap bergen.

Alaıda, turǵyndar qojalyq ıesi maldy qyrǵanymen qoımaı, adamdarǵa da qol jumsaıtynyn aıtyp otyr.

«Fermanyń qojaıyny ózi kelip «Nıvamen» soǵady nemese myltyqpen atamyn dep qorqytady. Sonda ol adamǵa zań joq pa dep tańǵalamyz. Maldy oıyna kelse, óltire beredi. Bıyldyń ózinde 3-4 jylqy óldi. Qyrylǵan buzaýdyń sany joq», - deıdi aýyl turǵyny Meltaı Zarthan.

Jergilikti bılik bul máselege qatysty eshkimnen resmı shaǵym túspegenin aıtyp otyr.

«Endi bul jaǵdaıda óz betinshe sheshim qabyldap, tergeýsiz sot júrgizgenge uqsaıdy. Ol maldy qalaı atqanyn aıta almaımyn. Degenmen, bul derek dáleldendi. Ol jazasyz qalmaıdy. Máseleni halyqpen birge baqylaýǵa alamyz. Kúnde ony qadaǵalaımyz. Endi qaıtalanbas úshin qolymyzdan kelgenin jasaımyz», - deıdi Tuzdy aýylynyń ákimi Indıra Ospanova.

Atylǵan bıeniń ókpesinen alynǵan oq dálel retinde jergilikti polıtsııaǵa jiberildi. Oqıǵa tergeýge alynady.