Malymyz brýtsellez emes – qostanaılyq turǵyndar ádildik surap otyr

<p>ASTANA. KAZINFORM &ndash; Kazinform agenttiginiń redaktsııasyna Qostanaı oblysy Áýlıekól aýdany Novojenın aýyldyq okrýgine qarasty Kalının aýylynyń turǵyndary habarlasyp, jan aıqaıyn jetkizdi. Olardyń aıtýynsha, sap-saý júrgen sıyrlary aıaq asty brýtsellez bolyp shyqqan.</p>

Táýelsiz sarapshylarǵa qosymsha qan synamasyn alǵyzaıyn dese ruqsat joq eken. Kúmán men kúdiktiń ortasynda qalǵan turǵyndar ne isterin bilmeı dal.

Aýyl turǵyny Úmitkúl Myrzataeva otbasymen birge memlekettik baǵdarlama sheńberinde elimizdiń ońtústik óńirinen kóship kelgen. Kalının aýylyna qonystanǵanyna 6 jylǵa jýyqtapty. Mamandyǵy – dáriger. Jalaqy az bolǵan soń, joldasymen birge mal sanyn kóbeıtip, nesibesin aıyryp, 5 balasyn asyrap otyr.

«22 jyl tájirıbem bolsa da 0,5 júktememen 140 myń teńge alyp otyrmyn. Aýylda mal asyramasań jalaqymen kúnelte almaısyń. Mal basy sanyn kóbeıtip, endi etek-jeńimizdi jııa bastadyq-aý degen kezde aınaldyrǵan 6 bas sıyrymyzdyń úsheýi brýtsellez dep otyr. Synama qaıta alynsyn desek, ruqsat bermeı otyr. Sonda jergilikti veterınarlar et kombınattarymen aýyz jalasyp otyr ma? Dáriger bolǵan soń saýatsyz emespiz. Brýtsellezge shaldyqqan maldyń ıeleri de aýrýǵa shaldyǵady. Biz sap-saýmyz», - deıdi Úmitkúl Myrzataeva.

Veterınardyń qaǵazyna kúmánmen qaraǵan ol malyn óriske jibergen. Endi jergilikti ýchaskelik polıtsııa «aýrý maldy nege óriske jiberesiń?» dep jaǵadan alyp otyrǵan kórinedi.

«Maldarym taza. Bularǵa joǵarydan «bálenbaı tonna et kerek» degen pármen túsetin sııaqty. Kári, aqsaq-toqsaq mal brýtsellezge shaldyqpaı, semiz, iri maldar ǵana aýrýǵa shaldyǵatyny da kúmándi. Jalǵyz meniń ǵana emes, bar aýyldyń iri maldaryn aýrý dep tanyp otyr. Kórshimniń búkil malyn qurtty. Ol kóship ketti. Bir qyzyǵy, qasapshylarmen tanystyǵy bar, belsendi azamattardyń maly eshqashan aýyrmaıdy. Biz sııaqty jýas, momyn, syrttan kelgen adamdardyń maly brýtsellezge shaldyǵady», - dep shaǵymdandy Úmitkúl Daýylbaıqyzy.

Kalının aýylynda aınaldyrǵan 30 úı ǵana bar eken. Úmitkúl Myrzataevanyń aıtýynsha, mundaı ádiletsizdik jalǵasa berse, aýylda eshkim de qalmaıdy. 

«Ońtústikten otbasylardy kóshirip, mektep jabylmaý úshin bala sanyn kóbeıtip, aýyldyń ajaryn arttyrý – Memleket basshysynyń tapsyrmasy emes pe? Jergilikti ákimdik bolsa el Prezıdentiniń saıasatyna qarsy shyǵyp, ádiletsizdik jasap, aýyl turǵyndarynyń kóship ketýine májbúr etýde. Biz Astanadan táýelsiz sarapshylar kelip, mal qanynyń synamasy qaıtadan alynsa eken deımiz. Ádildikke kóz jetkizgimiz keledi», - deıdi ol.

Turǵyndardyń jaı aıqaıyn muqııat tyńdap, Novojenın aýyldyq okrýginiń ákimi Serik Smaǵulovqa habarlastyq. Onyń óz aıtary bar.

«Novojenın aýyldyq okrýgine Novojenın, Josaly jáne Kalının aýyly kiredi. Josalyda mal aýrýy anyqtalǵan joq. Novojenın aýylynda brýtsellezge shaldyqqan 4 iri qara et kombınatyna ótkizildi. Bıyl kóktemde Kalının aýylynda 39 bas, al jýyrda 47 iri qaranyń brýtsellezge shaldyqqany anyqtalyp otyr. Turǵyndarmen túsindirý jumystary júrgizildi. Aýrý maldar arnaıy tehnıkamen et kombınattaryna jóneltiledi. Turǵyndardyń barlyǵy túsinistik tanytyp jatyr. Tek 2 otbasy ǵana qarsylyq bildirip, qan synamasyn qaıta alýǵa talpynýda. Bul jaıynda veterınar mamanmen sóılestim. Ondaıǵa ruqsat joq», - deıdi aýyl ákimi.

Onyń aıtýynsha, mundaı jaǵdaılar tańsyq emes. Buǵan deıin kórshi aýylda da osyndaı oqıǵa oryn alyp, aqyry turǵyndar sotta jeńilis tapqan. Osylaısha, aýyl ákimi másele aıǵaımen emes, zań júzinde sheshimin tabatynyna ıshara etkendeı kórindi.

Aýyl ákimi aldyńǵy jyldary Áýlıekól aýdanynda aýrýdyń adamdarǵa juǵý faktileri oryn alǵanyn, bul rette, turǵyndarǵa quzyrly organdardyń aıtqanyn oryndap, saqtyq sharalaryn saqtaýǵa shaqyrdy. 

Esterińizge salsaq, buǵan deıin adamdar brýtsellezdi qandaı jaǵdaıda juqtyryp alýy múmkin ekenin saralap kórgen edik.