Málik Myrzalın: Grant pen shákirtaqy - jastarǵa úlken qoldaý

KÓKShETAÝ. QazAqparat - Aqmola oblysynyń ákimi Málik Myrzalın oblystyq máslıhat depýtattary aldyndaǵy eseptik kezdesýinde jas mamandarǵa kórsetiletin qoldaý týraly aıtty, dep habarlaıdy QazAqparat tilshisi.

Bıyl oblystyq bıýdjetten 150 grant bólingen, onyń 50-i birinshi ret medıtsınalyq fakýltette, 100 grant pedagogıkalyq mamandyqtar boıynsha oqıtyn stýdentterge berildi.

«Medıtsınalyq mamandyqtarǵa respýblıkadan 18 grant bólinse, onyń altaýy ınternatýraǵa arnalǵan. Oǵan qosa, oblystyq bıýdjet esebinen ıntern oqýǵa qosymsha 6 grant bólý qarastyrylyp otyr», - dep atap ótti aımaq basshysy.

Jaqynda Shoqan Ýálıhanov atyndaǵy Kókshetaý memlekettik ýnıversıteti janynan ashylǵan medıtsınalyq fakýltette Úndistannan kelgen 150 stýdent bilim alatyn bolady. Qazirgi kezde olardyń jatyn orny men tamaǵyn óz elderi moınyna almaq.

Áleýmettik jaǵynan az qamtylǵan jastardyń sapaly kásibı bilim alýy úshin oblys ákiminiń shákirtaqysy taǵaıyndalǵan. Búgingi tańda oblys ákiminiń shákirtaqysy esebinen 276 aqmolalyq stýdent elimizdiń joǵary oqý oryndarynda bilim alyp júr. Osy maqsatta oblystyq bıýdjetten 102 mıllıon teńge qarjy bólingen.