Malaızııadaǵy Dımash Qudaıbergenniń kontserti qalaı ótti

ASTANA. QazAqparat – Kýala-Lýmpýrda tanymal qazaqstandyq ánshi Dımash Qudaıbergenniń jeke kontserti ótti. Axiata Arena-da alǵash ret qazaq halyq aspaptary oınap, qazaq ánderi shyrqaldy, dep habarlaıdy QazAqparat dimashnews.com saıtyna silteme jasap.

Qonaqjaı Malaızııaǵa ár elden kelgen qonaqtar Dımashtyń san qyrly baǵdarlamasymen tanysyp, ótken jyldyń qyrkúıeginde ánshiniń otanynda bastalǵan «Stranger» shoýyn tamashalaý úshin keldi. Shoý baǵdarlamasy kórermendi alýan túrliligimen tań qaldyrdy. Dımash túrli stılder men janrlarda jeti tilde kompozıtsııalar oryndady.

Kontsertte Dımashtyń oryndaýynda Eýropa men Amerıka avtorlarynyń «Golden», «If I never breathe again», «S.O.S» shyǵarmalary shyrqaldy. Sonymen birge, japondyq avtor Kozı Tamakıdiń «Autumn strong» ánin, «Screaming», «Let it be» kompozıtsııalaryn jáne qytaı tilindegi «Battle of Memory» saýnd-tregin oryndady.

Kompozıtor Igor Krýtoıdyń shyǵarmalary Dımashtyń shyǵarmashylyǵynda mańyzdy oryn alady. Shoýdyń «Stranger» tıtýldyq áninen, polıfonııalyq «Olımpıko», sondaı-aq «Ave Marııanyń» jáne barlyq Dears-tiń súıikti «Lıýbov ýstavshıh lebedeı» áninen bastap, nómirdi aıaqtaǵanǵa deıin barlyq zal hormen shyrqady.

Kontserttiń qonaǵy Sıtı Nýrhalız esimdi malaızııalyq ánshi óziniń keremet hıti «Bukan Cinta Biasa» jáne dástúrli «NIRMALA» ánin oryndaǵan bolatyn.

Dımash árdaıym óziniń basty mindeti – álemdik kórermendi óz eliniń mádenıetimen, jerlesteriniń shyǵarmashylyǵymen tanystyrý ekenin atap kórsetedi. Shoý baǵdarlamasynda kórermender ártispen birge qazaq tilindegi «Daıdıdaý» jáne «Dúrdaraz» halyq ánin, sondaı-aq qazaqstandyq kompozıtorlar Aıgúl Bajanovanyń «Mahabbat ber magan», Ediljan Ǵabbasovtyń «Fly Away» jáne Dımashpen birge jazǵan «Zhalyn» ánderin tyńdap, birge oryndady.

Kontsertte Dımashtyń inisi, jas kompozıtor Ábilmansur Qudaıbergen óziniń alǵashqy kompozıtorlyq jumysy «Together» ánin de úlken aǵasymen birge usyndy.

Ana tilinde erekshe áserli shyǵarmalardy oryndaǵannan keıin Dımash súıikti atasynan aıyrylǵannan keıingi qıyn kúnderde qoldaý kórsetkeni úshin jankúıerlerine alǵys aıtty.

«Kontserttiń ótý-ótpeýi ekitalaı edi, biraq sizderdiń qoldaýyńyzdyń arqasynda bári oıdaǵydaı ótip jatyr. Bizge ákemiz únemi «Eger sóz berseń, naǵyz jigitshe sózińde tur», – dep aqyl ósıetin aıtatyn.

Árıne, Dımashtyń «Umytylmas kún», «Give me your love» jáne «Be with me» shyǵarmalary kesh boıy shoýdyń jarqyn sátteri bolyp este qaldy.

Shoýdyń sońǵy bóliminde ıspan tilindegi «El amore en ti» iri kompozıtorlyq jumystary jáne osy keshte erekshe áserli bolǵan «The story of one sky» rekvıemi oryndaldy.