Malaızııada kontsertin ótkizgen Dımash jeti tilde án aıtty

KÝALA-LÝMPÝR. QazAqparat – Malaızııa astanasy Kýala-Lýmpýrdaǵy Axiata Arena-da alǵash ret Dımash Qudaıbergenniń jeke kontserti ótip, qazaq halyq aspaptarynyń úni áýeledi, dep habarlaıdy QazAqparat dimashnews.com saıtyna silteme jasap.

Malaızııaǵa Dımashtyń ónerin, onyń «Stranger» dep atalatyn álemdik deńgeıdegi shoýyn tamashalaý úshin álemniń túpkir-túpkirnen jankúıeri jınaldy. Shoý baǵdarlamasy kórermendi ártúrliligimen tań qaldyrdy. Dımash ár túrli stılder men janrlarda jeti tilde kompozıtsııa oryndady.

Eýropa men Amerıka avtorlarynyń «Golden», «If I never breathe again», «S.O.S» shyǵarmalary shyrqaldy. Japondyq avtor Kozı Tamakıdiń tereń jáne qaıǵyly «Autumn strong» áni Dımashtyń «I am a Singer» jobasyndaǵy sátterdi eske túsirdi. Ártistiń «Screaming», «Let it be» kompozıtsııalary jáne qytaı tilindegi «Battle of Memory» saýnd-tregi de oryndaldy.

Kompozıtor Igor Krýtoıdyń shyǵarmalary Dımashtyń shyǵarmashylyǵynda mańyzdy oryn alady. «Stranger» tıtýldyq áni, polıfonııalyq «Olımpıko», sondaı-aq «Ave Marııa» jáne barlyq Dears-tiń súıikti «Lıýbov ýstavshıh lebedeı» ánin zal qosyla shyrqady.

Malaızııalyq ánshi Sıtı Nýrhalız kontserttiń qonaǵy boldy, ol óziniń keremet hıti «Bukan Cinta Biasa» jáne dástúrli «NIRMALA» ánin aıtty.

Shoý baǵdarlamasynda kórermender ártispen birge qazaq tilindegi «Daıdıdaý» jáne «Dýrdaraz» halyq ánin, sondaı-aq qazaqstandyq kompozıtorlar Aıgúl Bajanovanyń «Mahabbat ber maǵan», Ediljan Ǵabbasovtyń «Fly Away» jáne Dımashpen birge jazǵan «Zhalyn» ánderin tyńdap, oryndady.

Jas kompozıtor Ábilmansur Qudaıbergen óziniń alǵashqy kompozıtorlyq jumysy «Together» ánin úlken aǵasymen birge usyndy.

Ana tilinde erekshe áserli shyǵarmalardy oryndaǵannan keıin Dımash súıikti atasynan aıyrylǵannan keıingi qıyn kúnderde qoldaý kórsetkeni úshin jankúıerlerine alǵys aıtty.

«Kontserttiń ótý ótpeýi eki talaı edi, biraq sizderdiń qoldaýyńyzdyń arqasynda bári oıdaǵydaı ótip jatyr. Bizge ákemiz únemi «Eger sóz berseń, naǵyz er adamsha sózińde tur», - dep aqyl-ósıetin aıtatyn.

Shoýdyń sońǵy bóliminde ıspan tilindegi «El amore en ti» iri kompozıtorlyq jumystary jáne osy keshte erekshe áserli bolǵan «The story of one sky» rekvıemi oryndaldy…

«Bul arman! Men óte baqytty ártispin, óıtkeni mende sizderdeı keremet tyńdaýyshlarym bar!» - dep Dımash óz jankúıerlerin kelesi kontsertterde kútetinin aıtty.