Malaızııa jazýshysy «Azııa avtorlary qaýymdastyǵyn» qurýdy usyndy
«Bizdiń álem - qazir óte qıyn orynǵa aınaldy. Qaqtyǵystar men soǵystar jıiledi. Dál osyndaı jaǵdaıda jazýshylardyń negizgi róli – osynaý álemdi jaqsartý. Bul shyǵarmashylyq turǵyda óte kúrdeli protsess. Biz, jazýshylar, uzaq ýaqyt boıy jazyp júrmiz. Ádebıettiń mańyzdy ekenin álemge túsindirýimiz kerek. Biraq ádebı tildi qazir ǵylym tili yǵystyryp barady», - dedi Mýhammad Hadjı Salleh.
Qalamgerdiń aıtýynsha, jazýshynyń mindeti – kúndelikti ómirge ádebıet tilin qaıtarý.
«Biz Azııa avtorlarynyń qaýymdastyǵyn qurýymyz kerek. Birikken azııalyq ádebıetti zertteı alatyn oryn bolýy tıis. Óıtkeni, eger men qazaq ádebıetin, japon nemese qytaı tilin oqyǵym kelse, maǵan ondaı múmkindik beretin ınstıtýtqa kelý kerek. Qazirgi tańda mundaı uıym joq. Siz amerıkalyq ýnıversıtettiń birine barýyńyzǵa bolady. Biraq, izdegenińizdi ol jerden taba almaısyz. Bizde azııalyq ádebıettiń tolyqqandy ınstıtýty bolýy kerek. Sonymen qatar, bizge qazaqstandyq jáne malaızııalyq jazýshylar, japon jáne úndi jazýshylary tájirıbe almasa alatyndaı baǵdarlama qajet», - dedi malaızııalyq qalamger.
Eske salsaq, elordada Azııa qalamgerleriniń І forýmy ótip jatyr. Oǵan ádebıet boıynsha Nobel syılyǵynyń 3 nomınanty qatysýda.
Forým barysynda Prezıdent Qasym-Jomart Toqaev Azııa alyby ádebı syılyǵyn taǵaıyndaýdy usyndy.