Malaızııa ýnıversıtetinde qazaq tili kýrsy ashylady

<p>ASTANA. KAZINFORM &ndash; Malaızııada qazaq tilin oqytatyn kýrystar ashylady. Bul týraly Malaızııada ótken Azııa elderindegi qazaqtardyń tuńǵysh quryltaıynda aıtyldy, dep habarlady &laquo;Otandastar qory&raquo; KeAQ.</p>

Quryltaı barysynda Malaızııa ýnıversıtetiniń Tilder jáne lıngvıstıka fakýltetiniń dekany orynbasary, doktor Azlın Zaıtı Zaınal ýnıversıteti qabyrǵasynda qazaq tili kýrstarynyń ashylatyny týraly qýanyshty jańalyqpen bólisti. Bul kýrs qazaq tilin sheteldik bilim ordasynda oqytý boıynsha mańyzdy qadam bolyp tabylady jáne Qazaqstan men Malaızııa arasyndaǵy mádenı baılanysty nyǵaıtýǵa úles qosady.

Doktor Azlınniń aıtýynsha, kýrs Malaııa ýnıversıtetinde qazaq tilin úırenýge nıet bildirgen stýdentter men oqytýshylarǵa arnalǵan. Ol kýrstyń damý jospary týraly aqparat berip, qazaq tiliniń grammatıkasy, leksıkasy jáne mádenıetpen tyǵyz baılanysty aspektilerin qamtıtynyn aıtty. Osy bastamanyń arqasynda qazaq tili men mádenıeti sheteldik stýdentter arasynda keńinen tanylyp, eki el arasyndaǵy bilim jáne mádenıet salasyndaǵy yntymaqtastyqty arttyrýǵa septigin tıgizedi.

Aıta keteıik, 11-12 qarasha aralyǵynda «Otandastar qory» KeAQ, Malaızııadaǵy qazaq qaýymdastyǵynyń uıymdastyrýymen, Qazaqstan Respýblıkasynyń Malaızııadaǵy Elshiliginiń qoldaýymen Malaızııanyń Kýala-Lýmpýr qalasynda Ońtústik-Shyǵys Azııa elderindegi qazaqtardyń tuńǵysh quryltaıy ótti. Quryltaıǵa Malaızııa, Koreıa, Sıngapýr elderinen 100 ge jýyq otandastarymyz qatysty.