Malaızııa premeri: Boeing-tiń qulaý sebepterin anyqtaý úshin Ýkraınaǵa mamandar jiberildi
Sondaı-aq ol Ýkraına basshylyǵynan Boeing 777 qulaǵan jerine barýǵa tolyq múmkindik beretin gýmanıtarlyq dáliz qurylatyny týraly habar alǵanyn atap ótti. Razak aıtyp ótkendeı, apattyń oryn alý sebebin anyqtaý boıynsha halyqaralyq top qurý máselesi telefon arqyly AQSh prezıdenti Barak Obamamen talqylandy. Barak Obama bul másele boıynsha jan-jaqty qoldaý kórsetýge ázir ekenin jetkizgen. Malaızııalyq premer halyqaralyq sarapshylar apat bolǵan aýdandy zertteý úshin bar múmkindikteri bolýy kerektigin atap ótti.
Eske sala keteıik, Amsterdam - Kýala-Lýmpýr baǵytynda ushqan «Malaızııalyq áýe jelisi» Boeing 777 beısenbi kúni Ýkraına aýmaǵyndaǵy Donetsk oblysynyń Grabovo eldi mekeninde apatqa ushyraǵan. Aldyn ala boljam boıynsha bortta bolǵan 283 jolaýshy, sonyń ishinde 3 sábı jáne 15 ekıpaj múshesi qaza tapty.