Malaızııa memlekettik basqarý salasynda Qazaqstanmen tájirıbe almasýǵa daıyn

<p>ASTANA. KAZINFORM — Malaızııa tabıǵı apat kezinde jáne odan keıin memlekettik qyzmetshilerdiń is-qımyl algorıtmderin jetildirý úshin Qazaqstanmen tájirıbe almasýǵa daıyn. Bul týraly Malaızııa Parlamenti Senaty tóraǵasynyń mindetin atqarýshy Nýr Djazlan Mohamed Qazaqstan Respýblıkasy Prezıdentiniń janyndaǵy Memlekettik basqarý akademııasynda ótken kezdesýde málimdedi. </p>

Malaızııa — Qazaqstannyń Ońtústik-Shyǵys Azııadaǵy negizgi seriktesteriniń biri. Malaızııada mýssondyq jańbyrlar men sý tasqyny jıi bolyp turady.

Malaızııa Senaty basshysynyń m. a. akademııa qyzmetkerlerimen jáne tyńdaýshylarymen kezdesýde sý tasqynymen kúresý boıynsha memlekettik qyzmetkerler arasynda tájirıbe almasýǵa daıyn ekenin atap ótti.

«Sý tasqynyn basqarý — óte mańyzdy is. Qazaqstan mundaı aýqymdy sý tasqynyn kútpegenin túsinemiz, biraq álemde klımattyq ózgeristerge baılanysty nóser jańbyrdan týyndaǵan sý tasqyny aldaǵy ýaqytta da bolý yqtımaldyǵy joǵary. Sondyqtan Malaızııa tabıǵı apat kezinde jáne odan keıin memlekettik qyzmetshilerdiń is-qımyl algorıtmderin jetildirý úshin Qazaqstanmen tájirıbe almasýǵa daıyn. Malaızııa Memlekettik basqarý akademııasy tarapynan biz memlekettik qyzmetshilerdiń biliktiligi men kommýnıkatıvtik daǵdylaryn arttyrý boıynsha oqytý kýrstaryn uıymdastyrýǵa ázirmiz. Daǵdarys kezinde jumys isteıtin mamandar bilikti bolýy kerek jáne halyqtyń muń-muqtajyn túsine alýy kerek», — dedi Nur Djazlan Mohamed.

Sondaı-aq spıker memlekettik qyzmetshiler jumysynyń tıimdiligin arttyrý, memlekettik basqarýdy tsıfrlandyrý jáne memlekettik sektor jumysynda jasandy ıntellektti paıdalanýdyń artyqshylyqtarymen bólisti.

Akademııa rektory Erlan Ábil Nur Djazlan Mohamedke alǵysyn aıtyp, Malaızııanyń memlekettik basqarý akademııasymen áriptestik qarym-qatynas ornatýǵa daıyn ekenin atap ótti.

Kezdesý sońynda akademııa tyńdaýshylary men qyzmetkerleri suraqtaryna jaýap aldy.