Malaızııa Mańǵystaý óńirine 1 mlrd dollarǵa jýyq ınvestıtsııa salady

ASTANA. QazAqparat - «EKSPO-2017» halyqaralyq mamandandyrylǵan kórmesi aıasynda ótip jatqan «Malaızııa-Qazaqstan» bıznes forýmynda malaızııalyq Reach Energy Berhad kompanııasy men Mańǵystaý oblysynyń ákimdigi arasynda túsinistik týraly memorandým jasaldy. Qujatqa Mańǵystaý oblysynyń ákimi Eraly Toǵjanov pen Reach Energy Berhad kompanııasynyń bas dırektory Shahýl Hamıd Mohd qol qoıdy, dep habarlaıdy QazAqparat.

Memorandýmǵa sáıkes Reach Energy Berhad kompanııasy aldaǵy jyldardyń ishinde Mańǵystaý oblysynyń munaı men gaz, ınfraqurylymdyq jobalar, qurylys elektr energetıkasy, sýmen qamtamasyz etý, týrızm syndy salalaryna malaızııalyq kompanııalardan 500 mln. dollardan bastap 1 mlrd. dollarǵa deıin ınvestıtsııa tartýǵa kómek kórsetetin bolady. Al oblys ákimdigi bolsa óz tarabynan malaızııalyq kompanııaǵa qol qoıylǵan qujattaǵy maqsattarǵa jetýge qoldaý jasap, ınvestıtsııalardy qorǵaý máselesinde járdem beredi.

«Búgingi memorandýmǵa qol qoıý eki el halqynyń áleýmettik-ekonomıkalyq damý jolyndaǵy taǵy bir mańyzdy kezeńi sanalady. «EKSPO-2017» kórmesine Malaızııa úkimetiniń 90-nan astam múshesi men jeke bıznes ókilderiniń qatysatyndyǵyn eskersek, aldaǵy ýaqytta eki  eldiń kompanııalary arasynda ózara túsinistik týraly birneshe memorandýmǵa qol qoıylyp, kelisimsharttar jasalady dep oılaımyz», - dedi Malaızııanyń Halyqaralyq saýda jáne ónerkásip mınıstriniń orynbasary Ahmad Maslan.