Malaızııa Qazaqstanmen munaı-gaz salasynda áriptestik ornatpaq

ALMATY. QazAqparat - Malaızııa Qazaqstanmen halal-ındýstrııa salasynda áriptestik ornatpaq. Bul týraly búgin Malaızııa-Qazaqstan iskerlik keńesi aıasynda ótken jıynda malaızııalyq Matrade syrtqy saýdany damytý korporatsııasy bas dırektorynyń orynbasary Ýan Latıf Ýan Mýsa aıtty, dep habarlaıdy QazAqparat tilshisi. 

Matrade korporatsııasy Malaızııa memleketiniń saýda jáne ındýstrııa mınıstrlgine qaraıdy. Atalǵan uıym eldiń basqa eldermen ekonomıkalyq baılanysy úshin jaýap beredi. 

Onyń aıtýynsha, byltyr Qazaqstan men Malaızııa arasyndaǵy saýda aınalymy 80 mln dollarǵa jetken. 

«Bıylǵy 7 aıda bul kórsetkish eki eselengenin kórip otyrmyz. Biz endi bul qarqyndy odan ári damytýǵa múddelimiz. Matrade Qazaqstan-malaı saýda palatasynyń jumysyn qoldaıdy. 2014 jyly Qazaqstanda Malaızııa elshiligi ashyldy. Bul eki el arasyndaǵy yntymaqtastyq pen áriptestikti damytýdyń bolashaǵy zor ekenin bildiredi», - dedi Ýan Latıf Ýan Mýsa. 
Sheteldik maman malaı bıznes qaýymdastyǵy Qazaqstannyń munaı-gaz, jıhaz, kıim, aǵash óńdeý, qyzmet kórsetý salalaryna ınvestıtsııa salýǵa múddeli ekenin aıtty. 

    Almatyda ótken «KEOGE» - «Munaı jáne gaz» qazaqstandyq halyqaralyq munaı jáne gaz kórmesi aıasynda Malaızııadan 14 kompanııa delegat bolyp keldi. 

Aıta ketý kerek, Malaızııa memleketi Qazaqstan táýelsizdigin alǵashqylardyń biri bop moıyndaǵan. 2014 jyly Memleket basshysy Nursultan Nazarbaevtyń Malaızııaǵa resmı saparynan soń qos tarap arasynda ekonomıkalyq-dıplomatııalyq áriptestikke jol qoıyldy. 

QR memlekettik paıdaly qazbalar qory boıynsha komıssııanyń habarlaýynsha, Qazaqstanda óndiriletin munaı qory 4,1 mlrd tonna shamasynda. Qurlyqtaǵy ken oryndaryn qosqandaǵy gaz kondensatynyń qory 300 mln tonnaǵa baǵalanyp otyr. 

QR Ulttyq banki taratqan aqparatqa sáıkes, Malaızııa 2016-2017 jáne 2018 jyldyń alǵashqy toqsanynda Qazaqstan ekonomıkasyna 16,6 mln AQSh dollary kóleminde tikeleı ınvestıtsııa salǵan. Al Qazaqstan Malaızııaǵa 251 myń AQSh dollary kóleminde taýar eksporttaǵan. Atap aıtqanda, Malaızııaǵa shıki munaı, qara metal ónimderi, ólsheý quraldary eksporttalǵan. Qazaqstan Malaızııadan 38 mln AQSh dollarynyń taýaryn ımporttaǵan.