Malaızııa qazaqstandyq kásipkerlerdi «jasyl» ekonomıkaǵa qarajat salýǵa shaqyrdy

ASTANA. QazAqparat - Malaızııa Halyqaralyq saýda jáne ónerkásip mınıstriniń orynbasary Ahmad Maslan  Qazaqstan kásipkerlerin Malaızııanyń «jasyl» ekonomıkasyna ınvestıtsııa salýǵa shaqyrdy. Ol mundaı usynysty búgin elordada ótip jatqan «Malaızııa-Qazaqstan» bıznes forýmynda jasady, dep habarlaıdy QazAqparat.

ıOnyń aıtýynsha, búginde Malaızııa úshin «jasyl tehnologııa» el ekonomıkasynyń bolashaqtaǵy qozǵaýshy kúshi retinde tańdap alynǵan. Sondyqtan da «jasyl tehnologııalar» úshin birqatar salyqtyq jeńildikter engizilgen. «Jasyl tehnologııalar» aktıvterin satyp alý barysynda korporatıvtik tabys salyǵyn jartylaı nemese tolyq bosatý da qarastyrylǵan. Munan bólek «jasyl tehnologııalar» qyzmetin jáne júıelerin  paıdalaný arqyly tapqan tabysqa da salyq salynbaıdy.

«Osy sátti paıdalana otyryp qazaqstandyq kompanııalar men «Astana EKSPO-2017» kórmesine qatysýshylardy Malaızııanyń  dál osy salasynda derbes nemese malaızııalyq kompanııalarmen birlese otyryp ınvestıtsııa salýǵa shaqyramyn. 2016 jyly Malaızııanyń ónerkásiptik damý basqarmasy «jasyl tehnologııa» salasyna 597 mln. dollar kóleminde ınvestıtsııany maquldady. Bul kórsetkish 2015 jyly 419 mln. dollar bolǵan edi. Bul «Jasyl tehnologııalardyń» damýy úkimettiń kómegimen birshama óse túskenin kórsetedi», - dedi Ahmad Maslan.

Onyń dereginshe, 2016 jyly Malaızııa men Qazaqstan arasyndaǵy saýda-sattyq kólemi 49,22 mln. dollardy quraǵan. Bul 2015 jylmen salystyrǵanda 36,1 paıyzǵa artyq.  Ótken jyly Malaızııa Qazaqstanǵa 43,78 mln. dollardyń taýaryn eske shyǵarǵan. Al Qazaqstannan alǵan ımport kólemi 109 protsentke artqan.

«Qazirgi ýaqytta Malaızııada 40-tan astam eldiń quramynda halyqaralyq korporatsııalary bar 8 myńnan astam kompanııasy jumys isteýde. Atalǵan kompanııalar Malaızııany ózderiniń óndiristeri men qyzmetteri úshin offshorlyq orynǵa aınaldyrǵan. Qazaqstandyq ınvestorlar úshin de Malaızııa mańyzdy ınvestıtsııalyq baǵytqa aınalaryna senemin», - dedi ol.