Mal jaıýǵa 8,9 mln gektar jaıylym jetispeıdi –AShM

ASTANA. QazAqparat – Qazaqstannyń 15 oblysynda mal jaıylymyna tapshylyq bar. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Qazaqstan Respýblıkasynyń Jer balansyna sáıkes, jaıylymdyq jerler 183,4 mıllıon gektardy quraıdy, onyń ishinde 82,4 mıllıon gektar – aýyl sharýashylyǵy maqsatyndaǵy jerler, 63,9 mıllıon gektar – bos jatqan jerler, 21,2 mıllıon gektar – eldi mekenderge irgeles jerler jáne 15,9 mıllıon gektar – basqa sanatta (orman qory, erekshe qorǵalatyn tabıǵat aýmaǵy, ónerkásip jerleri)», - dedi E. Qarashókeev Úkimettiń búgingi otyrysynda.

Mınıstrlik júrgizgen taldaý men ákimdikterdiń derekterine sáıkes, jeke qosalqy sharýashylyqtarda jaıylymǵa jaıylatyn 5,7 mıllıon mal bar.

«Jaıylymdardyń jalpy alańyna júktemeniń ruqsat etilgen shekti normatıvteri boıynsha jeke qosalqy sharýashylyqtardyń maldaryn jaıý úshin qosymsha 8,9 mıllıon gektar jaıylym qajet. Bul kóbinese jeke qosalqy sharýashylyqtarda aýyl sharýashylyǵy janýarlary sanynyń aıtarlyqtaı ósýine baılanysty. Mysaly, sońǵy 10 jylda tek iri qara mal basy 7,7% ósti. Al Túrkistan, Qyzylorda, Jambyl oblystary sııaqty óńirlerde mal basynyń ósý qarqyny shamamen 16% qurady», - dedi mınıstr.

Sonymen qatar uıymdasqan sharýashylyqtarda 5,9 mıllıon mal bar, ıaǵnı jaıylymdardyń eseptik rezervi 30,4 mıllıon gektardy quraýy múmkin.

«Respýblıkanyń 17 oblysy ishinde jeke qosalqy sharýashylyqtardyń mal jaıýy úshin 15 oblysta, ásirese Túrkistan, Qyzylorda, Almaty jáne Atyraý oblystarynda jaıylym tapshylyǵy baıqalady», - dedi Aýyl sharýashylyǵy mınıstri.