Mal jáne qus sharýashylyǵy qojalyqtaryna arzan baǵada 130 tonna jemdik astyq satyldy - mınıstr

NUR-SULTAN. QazAqparat – Azyq-túlik korporatsııasy mal jáne qus sharýashylyǵy qojalyqtaryna arzandatylǵan baǵamen 130,5 myń tonna jemdik astyq satty. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Mal azyǵymen qamtamasyz etý máselelerin sheshý úshin Úkimet jergilikti ákimshiliktermen birge birqatar jedel jáne júıeli sharalar qabyldady. Atap aıtqanda, 2022 jylǵy 31 qańtarda aýyl sharýashylyǵy janýarlarynyń analyq basyn kútip-baǵý shyǵyndaryn ishinara óteý úshin Úkimettiń rezervinen Mańǵystaý oblysyna 663,9 mln teńge bólindi. 2022 jylǵa oblys ákimdikteri mal azyǵyn satyp alý qunyn arzandatýdy sýbsıdııalaýǵa 11,5 mlrd teńge bóldi», - dedi mınıstr.

Onyń atap ótýinshe, 2022 jylǵy sáýirde respýblıkalyq bıýdjet komıssııasynyń otyrysynda 200 myń tonna kóleminde jemdik astyq satyp alý úshin Azyq-túlik korporatsııasynyń jarǵylyq kapıtalyn ulǵaıtýǵa 20 mlrd teńge bólý maquldandy. 22 tamyzdaǵy jaı-kúı boıynsha Azyq-túlik korporatsııasy mal jáne qus sharýashylyǵy qojalyqtaryna arzandatylǵan baǵamen 130,5 myń tonna jemdik astyq satty. Bul naryqtyq baǵadan 30 paıyzǵa tómen.

«Budan basqa, mınıstrlik jergilikti atqarýshy organdarmen birlesip, Azyq óndirisi salasyn damytý jónindegi 2022-2025 jyldarǵa arnalǵan jol kartasyn ázirlep, bekitti. Ol aýyl sharýashylyǵy janýarlaryn azyqpen qamtamasyz etý jónindegi júıeli sharalardy qamtıdy. Búgingi tańda jergilikti atqarýshy organdar Jol kartasynyń is-sharalaryn oryndaý jumysyn júrgizip jatyr», - dedi Erbol Qarashókeev.