Mal urlyǵy úshin qandaı jaza qoldanylady

NUR-SULTAN. QazAqparat – Krımınaldyq polıtsııa departamentiniń bastyǵy, polıtsııa polkovnıgi Dýman Taev mal urlyǵyn azaıtý boıynsha atqarylǵan jumystardy baıandady, dep habarlaıdy QazAqparat tilshisi.

«Mınıstrliktiń bastamasymen qylmystyq zańnamaǵa «Qylmysty birneshe ret jasaǵany úshin» jáne «Úı-jaıǵa zańsyz kirgeni úshin» qylmystyq jaýapty kúsheıtý boıynsha ózgerister engizildi. Atalǵan belgilerdi aýyr qylmys qataryna aýystyrý arqyly kúdiktiler ymyraǵa kelý jolymen jazadan sytylyp kete almaıdy, bul urlyq sanyn 51,6%-ǵa (108 718-den 52 602-ge deıin) tómendetýge múmkindik berdi», - dedi D. Taev mınıstrdik uıymdastyrǵan onlaın brıfıngte.

Onyń aıtýynsha, mal sharýashylyǵy adamdardyń ómiri men respýblıka ekonomıkasynda basym baǵyttardyń biri jáne aýyl halqy úshin eń basty qyzmet túri bolyp otyr.

Osyǵan baılanysty, mal urlyǵy eldegi eń jıi jasalatyn qylmys sanalady.

«ІІM bastamasymen bıyl aqpan aıynan bastap Qylmystyq kodekske 188-1 «Mal urlyǵy» baby engizilgenin atap ótken jón. Onda 12 jylǵa deıin bas bostandyǵynan aıyrý jáne múlkin tárkileý túrindegi eń joǵarǵy jaza kózdelgen. Bul baptyń urlyqtan basty aıyrmashylyǵy – qatań jaýapkershilik. Máselen jyl basynan beri mal urlyǵy úshin 350 kúdikti adam ustalyp, qamaýǵa alyndy, bul rette 77% (270) qatysty «Qamaýda ustaý» bultartpaý sharasy tańdaldy. Buryn bul kórsetkish 30% paıyzdan aspaıtyn», - deıdi departament basshysy.

Aıta keteıik, ótken aptada Qazaqstanda 251 mal urlyǵy anyqtalyp, 229 adam ustaldy.