Mal sharýashylyǵyndaǵy kórsetkishter jaqsaryp keledi – QR AShM

ASTANA. QazAqparat – Eldegi aýyl sharýashylyǵy ónimderiniń 40% mal sharýashylyǵyna tıesili. Bul týraly Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat.

«Taldaý jumystary jalpy salanyń turaqty qarqynmen damyp kele jatqanyn kórsetip otyr. Maldyń barlyq túrleriniń sany turaqty ósýde. Ótken 2022 jyldyń ózinde iri qara mal sany 4,2%, qoı 4,8%, jylqy 10,5%, túıe 6,5%, qus 4% kóbeıdi», - dedi E. Qarashókeev búgin Úkimet otyrysynda.

Sonymen qatar mal sharýashylyǵyn damytýdyń sapalyq kórsetkishteri de ulǵaıyp otyr. Atap aıtqanda, saýylatyn sút orta eseppen 4,7% artty, qoılardyń soıys salmaǵy 8,6%, taýyqtardyń jumyrtqa ákelýi 17,2% óskeni baıqalady.

Mınıstr 2022 jyly mal sharýashylyǵy ónimderin óndirý kólemi 0,9% ulǵaıǵanyn, bıylǵy 5 aıda ósim 3,6% quraǵanyn jetkizdi.

«Memlekettik qoldaý sharalaryn kúsheıtý esebinen maldyń barlyq túri boıynsha asyl tuqymdy maldyń úles salmaǵy ósti. Mysaly, asyl tuqymdy iri qara maldyń úles salmaǵy jalpy iri qara mal basyna shaqqanda 7%-dan 13,5%-ǵa deıin ósti. Sondaı-aq, selektsııalyq jáne asyl tuqymdyq jumys protsesine jáne tuqymdyq túrlendirýge tartylǵan fermerlik sharýashylyqtardyń sany 2022 jyly 6 myńnan 22 myńǵa deıin artty», - dedi Aýyl sharýashylyǵy mınıstri.