Mal sharýashylyǵynda qıyndyqtar neden týyndady – Mańǵystaý ákimi orynbasarynyń pikiri

AQTAÝ. QazAqparat - Mańǵystaý oblysy ákiminiń orynbasary turǵyndardy mal sharýashylyǵy isine asa jaýapkershilikpen qaraýǵa shaqyrdy, dep habarlaıdy QazAqparat tilshisi.

Bul týraly Mańǵystaý oblysynyń Qoǵamdyq kommýnıkatsııa ortalyǵynda ótken brıfıngide Mańǵystaý oblysy ákiminiń orynbasary Ǵalymjan Nııazov aıtty.

Onyń sózinshe, Mańǵystaýda aýyl sharýashylyǵymen aınalysý úshin áleýetti ǵana emes, táýekelderdi de eskertý shart.

«Maldyń jaıylatyn órisiniń aýyspaýy, jerdiń degradatsııaǵa ushyraýy, jańbyrdyń azdyǵy, kánigi malshylardyń azaıýy. Qazirgi kezde azamattardyń ortalyqta turyp kásip qylmaı maldy jaldap baqqyzý aýyl sharýashylyǵyndaǵy máselelerdiń týyndaýyna sebep bolyp otyr. Mal sharýashylyǵymen aınalysý isine asa jaýapkershilikpen qaraýymyz tıis», - dedi Ǵalymjan Nııazov.

Oblys ákiminiń orynbasary mal sharýashylyǵyna sanaly túrde kirisý kerektigin aıtty.

«Sharýanyń kóbi maldy jaıylymda baqylaýsyz qaldyrady. Maldyń azyǵyn qamtamasyz ete ala ma, joq pa, ony da aldyn-ala qarastyrmaıdy. Sondaı-aq, jergilikti klımatta ómir súre alatyn maldy ustaý qajet. Muny eskerý mańyzdy. Óz malyn ósirip, aman saqtap qalý maqsatynda ózi jumystanýy kerek. Tikeleı óz mindetin memleketke júktegen durys emes. Ár adam óziniń jeke menshigine jaýapkershilikpen qaraýy tıis», - dedi Ǵalymjan Nııazov.

Ǵalymjan Nııazov qysqy mal azyǵymen qamtý úshin bıýdjetten bólingen qarjy týraly aqparat berdi.

«Qysqy mal azyǵymen qamtý úshin bıýdjetten «Kaspıı» ÁKK-na 2,1mlrd. teńge qaıtarymdy qarjy 0,1 paıyzben kelesi jyldyń sáýir aıyna deıin bólindi. Qosymsha 3,2 teńge qarjy qaraldy. Qarjyny alý úshin aýdan ákimdikteri tórt túlik maldyń sanyna qaraı ózderiniń operatorlaryn usynyp qarjylaryn alyp jumystaryn istep jatyr. Eskere ketetin jaıt, operator qarjyny alý úshin mindetti túrde jyljymaıtyn jáne jyljıtyn múlkin kepildikke qoıýy tıis», - dedi Ǵalymjan Nııazov.

Úkimettiń qoldaýymen rezervten analyq mal basy úshin mal azyǵyna jumsalǵan shyǵyndardy ishinara óteýge 1,9 mlrd. teńge qarjy bólindi. Maldyń analyq basyn túgendeý boıynsha aýdandyq komıssııalar tirkegen 4 sharýashylyqtyń jáne 553 jeke azamattyń malynyń joqtyǵy anyqtaldy. Qazir aýyl ákimdikteriniń komıssııa aktileriniń qorytyndysy men aýdan, qala ákimderiniń ókimimen qurylǵan komıssııa sheshimderine sáıkes, 733 sharýa qojalyǵyna jáne 6776 jeke azamattardyń 281089 tórt túlik analyq malyna 1 mlrd 248 163 teńge kóleminde tegin kómek kórsetildi.