Mal sharýashylyǵyn damytýdyń tejeýshi faktory – jem-shóptiń jetkiliksizdigi – mınıstr
«Taldaý kórsetkendeı, mal sharýashylyǵyn jedel damytý men onyń ónimdiligin arttyrýdyń basty tejeýshi faktory - jemshóp bazasynyń jetkiliksizdigi. Qabyldanyp jatqan is-sharalarǵa qaramastan, búgingi tańda iri azyqpen qamtamasyz etý 80 paıyzdy, shyryndy azyqpen 40 paıyzdy, qunarly azyqpen qamtamasyz etý 50 paıyzdy quraıdy. Degenmen, turaqty damý úshin mal sharýashylyǵyn tolyq qamtamasyz etýmen qatar, azyqtyń saqtandyrý qory da bolýǵa tıis ekeni barshaǵa málim. Budan basqa, jaıylymdyq jerlerdiń ónimdiligin jaqsartý, olardy qarqyndy paıdalaný boıynsha problemalar bar», - dedi mınıstr.
Onyń aıtýynsha, mal azyǵy bazasynyń problemasyn sheshý maqsatynda ótken jyly mınıstrlik jem-shóp óndirisin damytýdyń 2022-2025 jyldarǵa arnalǵan jol kartasyn ázirledi.
«Alaıda, jergilikti jerlerde onda kórsetilgen is-sharalardy iske asyrý boıynsha áli de júıeli jumys joq, mal sharýashylyǵyn jem-shóp bazasyn esepke almaı damytý protsesi jalǵasýda. Budan basqa, mal sharýashylyǵyn memlekettik qoldaýdaǵy qazirgi qıǵashtyqtar, atap aıtqanda, sharýashylyqtarǵa mal bordaqylaý alańdary men et óńdeý kásiporyndaryna et kontıngentin jetkizý boıynsha mindettemeler men motıvatsııanyń bolmaýy, sýbsıdııalaýdyń joǵary sybaılas jemqorlyq sıpatqa ıe selektsııalyq-asyl tuqymdyq jumysqa shamadan tys shoǵyrlanýy, mal bordaqylaý alańdary men et óńdeý kásiporyndarynyń jartylaı júktelýine alyp keldi», - dedi Erbol Qarashókeev.
Mınıstrdiń aıtýynsha, sonyń nátıjesinde joǵary tehnologııalyq ónerkásiptik bordaqylaý men mal soıýdyń ornyna qosymsha qun men mal sharýashylyǵynan túsetin salyq túsimderiniń tıisti shyǵyndarymen, jergilikti jerlerdegi epızootııalyq ahýaldyń nasharlaýymen aýlalyq bordaqylaý jáne soıý órkendeı bastaǵan.