Mal óleksesin órteý úshin Aqtóbe óńiri Astanadan ınsınerator aldyryp jatyr

<p>AQTÓBE. KAZINFORM &ndash; Aqtóbede aldyn ala esep boıynsha 3 myńnan astam mal qyryldy. Qazir ony joıý jumystary júrip jatyr.&nbsp;</p>

Aqtóbe oblysy boıynsha sýǵa ketken aýdandardaǵy aýyldarda mal shyǵyny áli eseptelip jatyr. Oblystyq aýyl sharýashylyǵy jáne jer qatynastary basqarmasynyń basshysy Qusaıyn Sársembaıdyń aıtýynsha, myńnan astam mal jınap, joıyldy. Bul jumys jalǵasyp jatyr.

– Qazirgi kezde biz 3 myńnan astam mal basyn anyqtap otyrmyz. Úsh túrli tizim jasalyp jatyr. Birinshisi, qujattary túgel, tizimge alynǵan, ólimtigi bar, kózben kórip turǵan mal. Ekinshisi, ólimtigi bar, tizimde bar, biraq syrǵasy joq, túsip qalǵan. Úshinshisi, sýǵa aǵyp ketken mal. Qalaı anyqtalyp, qalaı qaıtarylatyny aldaǵy ýaqytta sheshiledi. Al ólekseni jınaý jumystaryn veterınar mamandar atqaryp jatyr. Keshe 1223 bas jınap, joıdy. Bizde ınsınerator bar. Sonymen órteıdi. Onyń qýaty azdaý bolǵan soń Premer-mınıstrdiń orynbasary Serik Jumanǵarınniń tapsyrmasymen Astanadan 3 tonnalyq ınsınerator aldyryp jatyrmyz. Jetkizilgende qalǵan ólekseni jınap, órteýge múmkindik bolady, - dedi Oblystyq aýyl sharýashylyǵy jáne jer qatynastary basqarmasynyń basshysy Qusaıyn Sársembaı.

Onyń aıtýynsha, qazir sý tasqyny bolǵan barlyq aýdanda mal óleksesi jınalyp jatyr. Keıbir aýylda jer keppeı, bul jumystardy atqarýǵa kedergi keltirdi.

Aıta keteıik, mal shyǵyny respýblıkalyq bıýdjet esebinen ótelýi múmkin. Boljam boıynsha shyǵyn kólemi 2,2 mlrd teńge bolady.