Mal azyǵyn daıyndaıtyn tehnıka alý úshin bólinetin nesıe somasy ulǵaıdy

ASTANA. QazAqparat – Mal azyǵyn daıyndaý men sýarý júıelerine arnalǵan tehnıka alý úshin «QazAgroQarjy» kompanııasynyń jarǵylyq kapıtalyn ulǵaıtý úshin 20 mlrd teńge bólindi. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Egindi ýaqytynda jáne sapaly jınap alý – elimizdiń azyq-túlik qaýipsizdigin qamtamasyz etý jónindegi basym mindetterdiń biri. Birqatar óńirlerde egin oraǵy bastalyp ketti. Úkimet tarapynan qarjylyq jáne materıaldyq-tehnıkalyq qamtamasyz etý boıynsha barlyq qajetti sharalar qabyldandy. Naryqtyq baǵadan 15 paıyzǵa tómen baǵamen 426 myń tonna dızel otyny bólindi. 140 mlrd teńge bıýdjettik kredıt berý kózdelgen. Sondaı-aq, jańa astyqty forvardtyq satyp alýǵa 81 mlrd teńge bólindi. Bıyl mal azyǵyn daıyndaýǵa arnalǵan tehnıka men sýarý júıelerin satyp alý úshin «QazAgroQarjy» kompanııasynyń jarǵylyq kapıtalyn ulǵaıtýǵa 20 mlrd teńge bólindi», - dedi Úkimet basshysy Álıhan Smaıylov.