Maqtaralda 3 gaz taratý stansasy salynady
Energetıka mınıstri Nurlan Noǵaev Úkimet otyrysynda osyndaı aqparat berdi.
«2021 jyldyń 1 qańtaryna oblystyń tabıǵı gazben qamtamasyz etilýi 64,4% nemese shamamen 1,3 mln adam tabıǵı gazben qamtamasyz etilgen. Usynylǵan keshendi jospar aıasynda Sozaq aýdanyndaǵy avtomattandyrylǵan gaz taratý stantsııasynan magıstraldyq gaz qubyryn jáne Maqtaaral aýdanynda 3 avtomattandyrylǵan gaz taratý stantsııasyn salý, sonymen qatar eldi mekenderge gaz taratý jelileri men gaz jetkizý qubyrlaryn salý josparlanýda», -dedi Nurlan Noǵaev.
Mınıstrdiń aıtýynsha, jergilikti ákimdiktiń jospary boıynsha 2026 jylǵa qaraı gazdandyrylǵan eldi mekenderdiń sanyn 423-ten 722-ke deıin ulǵaıtý kózdelgen.
Bul halyqty gazben qamtý 1 mln 274 myń turǵynnan 1 mln 720 myń turǵynǵa deıin jetedi degen sóz.
«Bul óńirdi gazdandyrý deńgeıin aǵymdaǵy 64,4%-dan 85,4% deıin jetkizýge múmkindik beredi. Ákimdik bul kórsetkishke bıýdjettik baǵdarlamalar sheńberinde jáne «Aýyl – el besigi» baǵdarlamasy boıynsha, sondaı-aq jergilikti bıýdjet qarajaty jáne basqa da ınvestıtsııa esebinen qol jetkizýdi josparlap otyr», - dedi Energetıka mınıstri.