Maqtaaralǵa dúngen mádenı ortalyǵynyń qaıyrymdylyq kerýeni kelip jetti
Qaıyrymdylyq kerýenin Qazaqstan halqy Assambleıasy men «Jambyl oblystyq «Vynhýa» dúngender qaýymdastyńynyń mádenı ortalyǵy» qoǵamdyq birlestigi jóneltti, dep habarlaıdy QazAqparat tilshisi.
5 mln teńgeniń gýmanıtarlyq kómegi tótenshe jaǵdaı jónindegi shtabtyń ortalyq qoımasyna jetkizildi. Eriktiler men jaýapty azamattar 30 tonnaǵa jýyq taýardy turǵyndarǵa úlestirip beretin bolady.
Aıta keteıik, Jambyldan jetken kómektiń ishinde 11 tonna un men 2,5 tonna qant, 2,5 tonna kúrish pen 1,5 tonna makaron, 1500 lıtr ósimdik maıy men 5,3 tonna kartop, 500 keli pııaz ben 300 keli tuz, 1000 qorap sháı men tazalyq zattary bar.
Osylaısha, dúngen etnosynyń ókilderi maqtaaraldyqtarmen birge ekenin dáleldep, Myrzashóldiń tez eńse tikteýine tilektes ekenderin jetkizdi. Kerýendi bastap kelgen Qordaı aýdany, Sortóbe aýylynyń ákimi Іlııas Býlarov tutas Qazaqstan jurtshylyǵy bir halyq retinde judyryqtaı jumylsa, alynbas qamal joq ekenin aıtty.
Óz kezeginde «Nur Otan» partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaev qıyn kezeńde janashyrlyq tanytyp, ystyq yqylasyn ala kelgen qordaılyqtarǵa alǵysyn bildirdi. Іs-sharany úılestirip, uıymdastyrǵan oblystyq Qazaqstan halqy Assambleıasy hatshylyǵynyń ókilderine birtutas qazaq eliniń birligin nyǵaıtatyn bastamalar jalǵasatynyn málimdedi.