Maqtaaralǵa Batys Qazaqstannan 12 tonna gýmanıtarlyq kómek jetti

MAQTAARAL. QazAqparat – Búgin Batys Qazaqstan oblysy Oral qalasynan jolǵa shyqqan kerýen Maqtaaral aýdanyna kelip jetti. 12 tonna gýmanıtarlyq kerýen kóligine azyq-túlikter men qurylys materıaldary, kıim-keshek jáne turmystyq qajetti qural-jabdyqtar tıelgen, dep habarlaıdy QazAqparat tilshisi.

Gýmanıtarlyq kómekti jınaýǵa Batys Qazaqstan oblysynyń etnomádenı birlestikteriniń ókilderi men kásipkerler, eriktiler úles qosqan. Sý tasqynynan zardap shekken maqtaaraldyq aǵaıyndarǵa kómek qolyn sozýǵa batystaǵy «Vaınah» sheshen-ıngýsh etnomádenı ortalyǵy men «Birlik» eriktiler toby, «Dostyq» qazaq-vaınah pen «Patriot» sport klýby, sonymen birge «Kadyrgalıev T.A.» JK, «UralskRunners» júgirýshilerdiń klýb músheleri uıymdastyrýǵa atsalysyp, qarajat jınaýǵa sep bolǵan. Batystan ońtústikke deıin jol tartqan kómek kóligin Túrkistan oblysy ákimi apparatynyń «Qoǵamdyq kelisim» KMM-niń Maqtaaral aýdanyndyq fılıaly mamandary, etnomádenı birlestik tóraǵalary men músheleri kútip alyp, gýmanıtarlyq kómek qoımaǵa tapsyryldy. Aıta keteıik, buǵan deıin Batys Qazaqstan oblysy men ondaǵy aýdandardan da gýmanıtarlyq kómek kelgen bolatyn.